પાકિસ્તાન : બાત કરોડો કી, દુકાન પકોડો કી ઔર

ભારતને થોડું ઘણું નુકસાન સહન કરવું પડશે, પણ તુર્કીયે અને અઝરબૈઝાન બંનેએ વધુ સહન કરવું પડશે. ૨૦૨૩માં બંનેનો અનુક્રમે ત્રણ અને બે લાખ ભારતીયોએ પ્રવાસ કર્યો હતો. તે મોટી આવક તેઓએ ગુમાવવી પડશે

- વિનોદ પંડ્યા

તમે અમારો ધર્મ જોઈને માર્યા હતા અને અમે તમારાં કર્મ જોઈને તમને માર્યા છે.' પાકિસ્તાન સાથેના યુદ્ધવિરામ બાદ દેશના સંરક્ષણ મંત્રીએ આ સત્ય-સુંદર વાક્યો ઉચ્ચાર્યા હતા. રામાયણમાં હનુમાનજીના વાક્યનો પુનરોચ્ચાર કરતાં રાજનાથ સિંહે કહ્યું કે, આપણાઓને જેઓએ માર્યા હતા તેઓને (શ્રીલંકામાં) અમે માર્યા છે. સનાતન સંસ્કૃતિની ભાવનાને કેન્દ્રમાં રાખી હમણાંના યુદ્ધમાં ભારતે પાકિસ્તાનના કોઈ નાગરિક વિસ્તારોમાં હુમલાઓ કર્યા નથી. સામાન્ય નાગરિકોને માર્યા નથી. જ્યારે પાકિસ્તાને કાશ્મીર અને જમ્મુના સરહદ પરના નિર્દોષ રહીશો પર તોપગોળા અને ગોળીઓ છોડી ભારતના પચ્ચીસથી વધુને હણ્યાં છે. ઇસ્લામવાદી પાકિસ્તાનના શરીરીમાં રાક્ષસ ઘૂસી ગયો છે અને રાષ્ટ્રીય સ્વયંસેવક સંઘના વડા મોહન ભાગવતજીએ કહ્યું હતું તેમ, પ્રજાનું રક્ષણ કરવું તે રાજાનું કર્તવ્ય છે અને તે માટે હિંસા આચરવી પડે તો તે હિંસા નથી, પણ ધર્મ છે અને વડાપ્રધાને એ કર્તવ્યનું, એ ધર્મનું પાલન કરી બતાવ્યું છે. નરેન્દ્ર મોદી સમક્ષ, દેશ આજે નતમસ્તક છે અને ખુશીથી ગદ્ગદ્ પણ છે.

રાષ્ટ્રધર્મ સમજવાનો જેઓમાં વિવેક છે, એવા કોંગ્રેસના શશી થરૂર, અન્યથા મોદીના વિરોધી અસદુદ્દીન ઓવૈસી, ડીએમકેનાં કનીમોઝી અને એનસીપીનાં સુપ્રિયા સુલે વગેરે વિરોધ પક્ષમાં હોવા છતાં સમયની માગ અનુસાર દેશ, સરકાર અને સેનાની પડખે મક્કમતાથી ઊભાં રહ્યાં છે. ભારતની મશહૂર બિલ્લોરાની રાહુલ અને એક સમયે ઉત્તર પ્રદેશની આખી સરકાર બાહુબલિઓને હવાલે કરી દીધી હતી તે, સમાજવાદી અખિલેશ ઝરખ સિવાય દેશમાં બીજા કોઈને કશો વાંધો નથી. તુર્કીય દ્વારા પાકિસ્તાનને મદદ કરાઈ તે માટે પત્રકાર પરિષદમાં પ્રશ્ન પૂછાયો તો જયરાવણ રમેશ અને પવન રાજીવ ખેડા, સૉરી...પવન ખેડા, બંનેનો નશો હવા થઈ ગયો એ એકમેક સામે માઇક ધરી રમેશ કહે, તું જવાબ આપ, ખેડા કહે તું આપ, એ રમત શરૂ થઈ ગઈ. ગાંધી બની ચૂકેલાં રાજમાતાને ત્યાં મગજ ગિરવે મૂકવાથી કેવી માનસિક ભ્રમણા ઓ અને ગુલામી માનસ પેદા થાય છે, તેનું આ વ્યવસ્થિત અને નકોર ઉદાહરણ છે.