എപ്പോൾ വേണം ഡയാലിസിസ്

ഇരു വൃക്കകളും തകരാറിലായവർക്ക് വൃക്ക മാറ്റിവയ്ക്കുന്നതുവരെ ജീവൻ നിലനിർത്താൻ സഹായിക്കുന്ന സംവിധാനമാണ് ഡയാലിസിസ്. എപ്പോഴാണ് ഡയാലിസിസ് ചെയ്യേണ്ടത്, ഏതൊക്കെ തരത്തിലുണ്ട്, ശ്രദ്ധിക്കേണ്ട കാര്യങ്ങൾ എന്തൊക്കെ തുടങ്ങിയ വിവരങ്ങൾ അറിയാം

- ഡോ.അനീബ് രാജ് വി.പി. അസിസ്റ്റന്റ് പ്രൊഫസർ നെഫ്രോളജിവിഭാഗം ഗവമെഡിക്കൽകോളേജ്, തൃശ്ശൂർ

വൃക്കരോഗമുള്ളവരുടെ എണ്ണം കൂടിവരുകയാണെന്നാണ് കണക്കുകൾ സൂചിപ്പിക്കുന്നത്. അമിത ബി.പി.യും നിയന്ത്രണത്തിലല്ലാത്ത പ്രമേഹവുമാണ് 80 ശതമാനം വൃക്കരോഗങ്ങൾക്കും കാരണമാകുന്നത്. ഇത്തരത്തിൽ വൃക്കസ്തംഭനമുണ്ടായാൽ വളരെ പെട്ടെന്നു തന്നെ വൃക്ക മാറ്റിവയ്ക്കുന്നതാണ് ഏറ്റവും നല്ലത്. എന്നാൽ വൃക്ക ലഭിക്കാനുള്ള ബുദ്ധിമുട്ടുമൂലം പലർക്കും അത് സാധിക്കാറില്ല.

റീനൽ റീപ്ലേസ്മെന്റ് തെറാപ്പി എന്ന ഡയാലിസിസ്

വൃക്കകളുടെ പ്രവർത്തനശേഷി 90 ശതമാനത്തിലും താഴെയാകുമ്പോൾ രോഗിയുടെ ജീവൻ രക്ഷിക്കാൻ വൃക്കകളുടെ പ്രവർത്തനം ഭാഗികമായെങ്കിലും മറ്റൊരു സംവിധാനത്തിലൂടെ നടത്തുന്നതിനെയാണ് റീനൽ റീപ്ലേസ്മെന്റ് തെറാപ്പി അഥവാ ഡയാലിസിസ് എന്ന് പറയുന്നത്. രക്തത്തിലെ മാലിന്യങ്ങൾ ശുദ്ധീകരിക്കുന്ന വൃക്കയുടെ ജോലി കൃത്രിമമായി മറ്റൊരു സംവി ധാനത്തിലൂടെ നടത്തുകയാണ് ഇവിടെ ചെയ്യുന്നത്. രക്തത്തിലെ മാലിന്യങ്ങൾ നീക്കുക, ശരീരത്തിൽ അമിതമാകുന്ന വെള്ളം നീക്കുക എന്നിങ്ങനെ രണ്ട് പ്രധാനപ്പെ ട്ട കാര്യങ്ങളാണ് ഡയാലിസിസിലുള്ളത്. വൃക്ക മാറ്റിവയ്ക്കുന്നതുവരെ രോഗിയുടെ ജീവൻ നിലനിർത്തുക എന്നതാണ് ഡയാലിസിസ് കൊണ്ട് ഉദ്ദേശിക്കുന്നത്.

ഡയാലിസിസ് വേണ്ടിവരുന്നത്

പ്രധാനമായും രണ്ട് സാഹചര്യത്തിലാണ് ഡയാലിസിസ് വേണ്ടിവരുന്നത്.

അക്യൂട്ട് കിഡ്നി ഇൻജുറി: വൃക്കകൾ പെട്ടെന്ന് തകരാറിലായി ഡയാലിസിസ് വേണ്ടി വരുന്ന അവസ്ഥയാണിത്. അക്യൂട്ട് കിഡ്നി ഇൻജുറി എന്ന് ഇത് അറിയപ്പെടുന്നു. മറ്റ് അസുഖങ്ങളൊന്നുമില്ലാത്ത ആളുകളിൽ ചില സാഹചര്യങ്ങൾ മൂലം വൃക്കകൾ പെട്ടെന്ന് പ്രവർത്തനം നിർത്തുന്നതാണ് ഈ അവസ്ഥയ്ക്ക് കാരണം. എലിപ്പനി, പാമ്പുകടി, മറ്റുചില അണുബാധകൾ, വൃക്കയ്ക്ക് ഏൽക്കുന്ന ആഘാതം, വൃക്കയിലേക്ക് രക്തമൊഴുക്ക് കുറയുന്നതു മൂലമുണ്ടാകുന്ന പ്രശ്നങ്ങൾ എന്നിവയാണ് ഇത്തരം വൃക്കസ്തംഭനത്തിന് കാരണം. ചികിത്സയൊപ്പം ഇവർക്ക് താത്കാലികമായി ഡയാലിസിസ് ചെയ്യേണ്ടിവരും. 90 ശതമാനം പേർക്കും വൃക്കയുടെ ആരോഗ്യം തിരിച്ചുകിട്ടുകയും ചെയ്യും. അതിനാൽ പിന്നീട് ഇവർക്ക് ഡയാലിസിസ് ആവശ്യമില്ല.