തീരുമാനം നടപ്പിലാകുന്നില്ലേ

വ്യായാമം ചെയ്യണം, ഭക്ഷണം ക്രമീകരിക്കണം, അമിതവണ്ണം കുറയ്ക്കണം തുടങ്ങിയ തീരുമാനങ്ങളൊന്നും നടപ്പിലാകുന്നില്ലേ? ഓർക്കുക, ലക്ഷ്യങ്ങൾ നിശ്ചയിക്കുമ്പോൾ വരുന്ന പാകപ്പിഴകളാണ് പലപ്പോഴും തീരുമാനങ്ങൾ പരാജയപ്പെടാനുള്ള പ്രധാന കാരണം

- ഡോ.ഹരി എസ്.ചന്ദ്രൻ കൺസൾട്ടന്റ്സൈക്കോളജിസ്റ്റ് ഡാ.കെ.എം.ചെറിയാൻഇൻസ്റ്റിറ്റ്യൂട്ട് ഓഫ് മെഡിക്കൽസയൻസസ്,ചെങ്ങന്നൂർ [e-mail]

ഒരു സഹപ്രവർത്തകനെപ്പറ്റിയാണ് ഇവിടെ പറയുന്നത്. 120 കിലോയോളം ഭാരമുള്ള അദ്ദേഹം സ്വന്തം അവസ്ഥയെപ്പറ്റി വല്ലാതെ ദുഃഖിതനായിരുന്നു. ഇടയ്ക്കൊക്കെ അത് തുറന്നു പറയാറുമുണ്ട്. ഒരു സുപ്രഭാതത്തിൽ അദ്ദേഹം കടുത്ത തീരുമാനമെടുത്തു. മേലാൽ അന്നജാഹാരം ഉപയോഗിക്കില്ല. അടുത്തദിവസം രണ്ട് ടിഫിൻ ബോക്സുമായാണ് ജോലിക്ക് വന്നത്. ഒന്നിൽ പേരയ്ക്കയും മറ്റെതിൽ ആപ്പിളും കഷണങ്ങളാക്കിയത്. ആദ്യത്തെത് ബ്രേക്ക്ഫാസ്റ്റിന്, അടുത്തത് ഉച്ചഭക്ഷണത്തിന് രണ്ടാഴ്ച കഴിഞ്ഞിട്ടും ശരീരഭാരത്തിന് ഒരു കുറവും വന്നില്ലെന്ന് മാത്രമല്ല, അല്പം വർധിക്കുകയും ചെയ്തു. ജിജ്ഞാസയോടെ കാരണമന്വേഷിച്ചപ്പോൾ രസകരമായ മറുപടി വന്നു. രാവിലെ കാർയാത്രയ്ക്കിടയിൽ പേരയ്ക്ക തിന്നു തീർക്കും. പത്തുമണിയോടെ ആപ്പിളും. പതിനൊന്ന് മണിക്ക്, മുൻപ് പതിവുണ്ടായിരുന്ന വടയും ചായയും. ഉച്ചയ്ക്ക് പഴയതുപോലെ ബീഫ് കൂട്ടിയുള്ള ഊണും. രണ്ടാഴ്ചത്തെ ആഹാര നിയന്ത്രണത്തിലൂടെ ഏതാനും റാത്തൽ ആപ്പിളും പേരയ്ക്കയും അകത്താക്കി എന്നതല്ലാതെ മറ്റു വിശേഷങ്ങൾ ഒന്നും ഉണ്ടായില്ല.

ഐ. ടി. മേഖലയിൽ ഉയർന്ന ജോലിയുള്ള യുവതി. വിവാഹം കഴിഞ്ഞ് മൂന്നുവർഷമായിട്ടും ഗർഭം ധരിക്കാതിരുന്നപ്പോൾ ഡോക്ടറെ കണ്ടു. അമിത ഭാരമുള്ളതിനാൽ ഭാരം കുറയ്ക്കാൻ ഗൈനക്കോളജിസ്റ്റ് നിർദേശിച്ചു. അതിനായി ഭക്ഷണശീലങ്ങൾ മാറ്റിയേ മതിയാകൂ. വ്യായാമവും തുടങ്ങണം. തന്റെ ജീവിതത്തിൽ പുതിയ അധ്യായം ആരംഭിക്കാൻ അവർ ആത്മാർഥമായി തീരുമാനിച്ചു. വിലകൂടിയ ട്രെഡ്മില്ലിന് ഓർഡർ ചെയ്തു. ഡയറ്റീഷ്യന്റെ വാക്കുകൾ കൃത്യമായി പിന്തുടരാനുറച്ചു.

എന്നാൽ, അടുത്തദിവസം ഉണരാൻ വൈകി, ഇന്ന് വ്യാഴാഴ്ച...ഞായറാഴ്ച പ്രാർഥിച്ചശേഷം ശ്രമങ്ങൾ ആരംഭിക്കാം. രണ്ട് ദിവസങ്ങൾ അങ്ങനെ പോയി. ഞായറാഴ്ച വന്നകാര്യം ശ്രദ്ധയിൽപ്പോലും പെട്ടില്ല. ഒടുവിൽ എന്ത് സംഭവിച്ചു? വിലകൂടിയ ട്രെഡ്മിൽ അടിയുടുപ്പുകൾ ഉണക്കാനുള്ള അത്യാഹിത ഹാങ്ങർ ആയി സേവനം നടത്തുന്നു. ഭക്ഷണക്രമം പതിവുപോലെത്തന്നെ.

പരാജയങ്ങൾ എന്തുകൊണ്ട്