കുരുമുളക് ഉൽപാദനം ഇടിയുമെന്ന് അനുമാനം

വില ഉയരുമെന്നു പ്രതീക്ഷ. വിപണിയിലേക്കു മുളകുവരവ് കുറയുന്നു

- കെ. ബി. ഉദയഭാനു ഇ-മെയിൽ: ajournalist5@gmail.​com

ദക്ഷിണേന്ത്യയിലെ കാലാവസ്ഥമാറ്റത്തിൽ ഇക്കുറിയും കുരുമുളക് ഉല്പാദനം ഇടിയുമെന്ന് ഉൽപാദകർ. കേരളത്തിൽ മാത്രമല്ല, കർണാടകത്തിലും വിളവു കുറ യുമെന്ന് തോട്ടങ്ങളിൽ നടത്തിയ വിലയിരുത്തലുകൾ വ്യക്തമാക്കുന്നു. ഹൈറേഞ്ചിലും വയനാട്ടിലും കഴിഞ്ഞ സീസണിനെക്കാൾ വിളവ് ഇടിയുമെന്നു മനസ്സിലാക്കി ക്രിസ്മസ് വേളയിൽ രേഖപ്പെടുത്തിയ ഉയർന്ന വിലയ്ക്കു പോലും മുളകു വിപണിയിൽ ഇറക്കാൻ കർഷകരും മധ്യവർത്തികളും താല്പര്യം കാണിച്ചില്ല.

ഹൈറേഞ്ചിലും മറ്റു ഭാഗങ്ങളിലും വ്യവസായികൾക്കു വേണ്ട, മൂപ്പു കുറഞ്ഞ കുരുമുളകിന്റെ വിളവെടുപ്പ് പുരോഗമിക്കുന്നു. മുൻവർഷത്തെ അപേക്ഷിച്ച് ആകർഷകമായ വില ഉറപ്പു വരുത്താനായത് ചെറുകിട കർഷകരെ തോട്ടങ്ങളിലേക്ക് അടുപ്പിച്ചു. നവംബറിൽ കിലോയ്ക്ക് 165 രൂപയ്ക്ക് കൈമാറിയ, മൂപ്പു കുറഞ്ഞ പച്ചക്കുരുമുളകിന്ഇ ക്കുറി വ്യവസായമേഖലയിൽ നിന്നു പതിവിലും കൂടിയ ഡിമാൻഡ് ഉണ്ട്. അച്ചാർ നിർമാതാക്കളാണ് ഇത്തരം മുളക് മുഖ്യമായും ശേഖരിക്കുന്നത്. വ്യവസായികളുടെ ആവശ്യത്തിന് അനുസൃതമായി ചരക്ക് ഇറങ്ങുന്നില്ലെന്നു കണ്ട് വാങ്ങലുകാർ നിരക്ക് 225 രൂപ വരെ ഉയർത്തി. നേരത്തേ സത്ത് നിർമാതാക്കൾ എണ്ണ അംശം ഉയർന്ന കുരുമുളക് തെക്കൻ ജില്ലകളിൽനിന്നു ശേഖരിച്ചിരുന്നു. ഒലിയോസിൻ വ്യവസായികൾക്കു വേണ്ട ചരക്കിൽ വലിയൊരു പങ്കിനും അവർ ഇറക്കുമതിയെയാണ് ആശ്രയിക്കുന്നത്. ആഭ്യന്തര ഉൽപാദനം വർധിപ്പിച്ചാൽ കാർഷിക മേഖലയുടെ വരുമാനം ഉയർത്താനാവും. ഹൈറേഞ്ചിലെ കർഷകർ വിദേശ വിപണികളിൽ പ്രിയമുള്ള മുളകിനങ്ങൾ (ഉദാ: നീലമുണ്ടി) കൃഷി ചെയ്താൽ ഇറക്കുമതി ലോബിയുടെ ഭീഷണികളെ മറികടക്കാനാവും.