നിറവിന്റെ കരുത്തിൽ നഗരക്കൃഷി മുന്നേറ്റം

വിഷരഹിത പച്ചക്കറിക്കു നഗരത്തിലെ പ്രിയം പ്രയോജനപ്പെടുത്തി കോഴിക്കോട് കർഷക കൂട്ടായ്മ

- 

നഗരവാസിക്കു പച്ചക്കറിക്കൃഷിയിലൂടെ പ്രതിമാസം 10,000 രൂപ അധിക വരുമാനം കണ്ടെത്താനാവുമോ? അന്വേഷണം ചെന്നെത്തിയത് ദേവദാസനിലാണ്. കോഴിക്കോട് നഗരത്തിലാണ് വാസമെങ്കിലും 15 കി.മീ. അകലെ അത്തോളിയിലാണ് അദ്ദേഹത്തിന്റെ കൃഷിയിടം. എന്നാൽ, നഗരവാസികൾക്കു വേണ്ടിയാണ് അവിടെ കൃഷി. വെറും കൃഷിയല്ല, ജൈവ സാക്ഷ്യപത്രമുള്ള കൃഷി. ഒരേക്കർ നിറയെ നാടൻ പച്ചക്കറികൾ. കോവൽ, വൈദ്യ കുമ്പളം, കാളക്കൊമ്പൻ വെണ്ട, നാടൻ തക്കാളി, ബേബി പടവലം, ചതുരപ്പയർ എന്നിവ പ്രധാനം. പപ്പായ, പുതിന എന്നിവയുമുണ്ട്. ഇവയുടെ തൈകളുണ്ടാക്കാൻ നഴ്സറിയും.

രാവിലെ കൃഷിയിടത്തിലേക്കു പോകുന്ന ദേവദാസനു സിറ്റിയിൽ വിപണനത്തിനു തുണയാവുന്നതു നിറവ് ഫാർമർ പ്രൊഡ്യൂസർ കമ്പനി. വേങ്ങേരി മൊത്തവ്യാപാരകേന്ദ്രത്തിൽ കമ്പനി നടത്തുന്ന ഫാർമർ സപ്പോർട്ട് സെന്ററിലും വണ്ടിപ്പേട്ടയിലെ സെയിൽസ് കൗണ്ടറിലുമായി അദ്ദേഹം തൈകളും പച്ചക്കറികളും വിൽക്കുന്നു. നഗരത്തിലെ അഗ്രി ബിസിനസ് സാധ്യത തിരിച്ചറിഞ്ഞ ദേവദാസനും കുടുംബ വും കാർഷികോപകരണങ്ങൾ, വളം കീടനാശിനികൾ, വിത്തുകൾ എന്നിവയുടെ കടയും നടത്തി വരുന്നു.