കൃഷിയെഴുത്തിന്റെ തമ്പുരാൻ

കാർഷിക പത്രപ്രവർത്തനത്തിലെ കുലപതിയും കർഷകശീയുടെ എഡിറ്റർ ഇൻ ചാർജുമായിരുന്ന ആർ.ടി. രവിവർമയെ ഓർമിക്കുന്നു

- ടി.കെ. സുനിൽകുമാർ

കർഷകശ്രീ മാസികയിൽ 1996ൽ പ്രസിദ്ധീകരിച്ച ഗ്രാമങ്ങളിലൂടെ എന്ന പരമ്പരയിലേക്ക് ആദ്യം തിരഞ്ഞെടുത്തത് തൃശൂർ ജില്ലയിലെ പാഞ്ഞാൾ ഗ്രാമം. അരവിന്ദന്റെ "ഒരിടത്ത്' എന്ന സിനിമയിൽ വൈദ്യുതി എത്താത്ത ഗ്രാമമായി അഭിനയിച്ച പാഞ്ഞാൾ അന്നും ഏകദേശം അതേയിടത്തുതന്നെ നിൽക്കുകയായിരുന്നു. പരമ്പര അവിടെനിന്നു തുടങ്ങാനുള്ള കാരണവും മറ്റൊന്നായിരുന്നില്ല.

പാഞ്ഞാളിലേക്കുള്ള യാത്രയിൽ രവി വർമ സാറുമുണ്ടായിരുന്നു. അൽപം ആരോഗ്യപ്രശ്നമുണ്ടായിരുന്നിട്ടും അന്ന് അദ്ദേഹം വന്നത് പാഞ്ഞാൾ, കുണ്ടൂർ അതിരാത്രങ്ങളിൽ ആചാര്യനായിരുന്ന നെല്ലിക്കാട്ടുമന നീലകണ്ഠൻ അക്കിത്തിരിപ്പാടിനെ കാണുകയെ ന്ന ഉദ്ദേശ്യം കൂടിയുണ്ടായിരുന്നതുകൊണ്ടാണ്. മനയിലെത്തി കാറിൽനിന്ന് ഇറങ്ങുമ്പോൾ വന്ദ്യവയോധികനായ അക്കിത്തിരിപ്പാട് പൂമുഖത്തു തന്നെയുണ്ട്. ഒപ്പമുണ്ടായിരുന്ന എന്നെ ഞെട്ടിച്ചുകൊണ്ട് അദ്ദേഹത്തിന്റെ മുന്നിൽ മണ്ണിലേക്ക് ഒറ്റ വീഴ്ചയായിരുന്നു വർമ സാർ. ശരിക്കും സാഷ്ടാംഗ പ്രണാമം.