ഫംഗസ് ഈസ് ഫൺ, ഗെയ്സ്

കൂൺവളർത്തൽ ആയാസരഹിതമാക്കാൻ റെഡ്മെയ്ഡ് ഗ്രോ കിറ്റും മഷ് പെല്ലറ്റും

- ജയിംസ് ജേക്കബ് തുരുത്തുമാലി

കടും പിങ്ക് നിറമുള്ള കൂൺ കണ്ടിട്ടുണ്ടോ? മഞ്ഞനിറമുള്ള കൂൺ കഴിച്ചിട്ടുണ്ടോ കണ്ടിട്ടില്ല, കണ്ടാലും കഴിക്കുകയുമില്ല' എന്നാവും 99 ശതമാനം മറുപടിയും. വെളുത്തതല്ലാത്ത കൂണാക്കെ വിഷമാണെന്ന ധാരണ അത്ര വ്യാപകമാണ്. ചെറിയൊരു നിറംമാറ്റം കണ്ടാൽ പോലും കൂൺ ചവറ്റുകുട്ടയിലിടുന്ന നമ്മുടെ നാട്ടിൽ ഇതാ കടുംനിറമുള്ള കൂണുകളുടെ വളർത്തുകിറ്റുമായി സ്റ്റാർട്ടപ് സംരംഭം.

നിർമിതബുദ്ധിയിൽ ബി ടെക് നേടിയ ശേഷം സ്വന്തം സംരംഭം നടത്തുകയും പിന്നീട് അമേരിക്കൻ കമ്പനിയിൽ 5 വർഷത്തോളം ജോലി ചെയ്യുകയും ചെയ്ത ചെറുപ്പക്കാരൻ തിരികെ നാട്ടിലെത്തി കൂൺകൃഷി നടത്തുമെന്ന് ആരെങ്കിലും കരുതുമോ? എന്നാൽ ആദം ഷംസുദ്ദീന്റെ കാര്യത്തിൽ അതാണ് സംഭവിച്ചത്. പക്ഷേ, സാദാ കൂണല്ല, മഞ്ഞയും പിങ്കും നിറമുള്ള സവിശേഷയിനങ്ങളാണ് ആദം വളർത്തുന്നത്.

തൃശൂർ കൊരട്ടി മായയിലുള്ള ആദം ഷംസുദ്ദീനും ഭാര്യ റെയ്സ് മനാലും ചേർന്നാണ് സംരംഭനടത്തിപ്പ്. കിറ്റിൽ ഇത്തിരി വെള്ളം തളിച്ചാൽ മതി, ആർക്കും കൂൺ ഉൽപാദിപ്പിക്കാം. അത്ര ലളിതമാണ് ആദം മഷ്റൂം പ്രൈവറ്റ് ലിമിറ്റഡിന്റെ സാങ്കേതികവിദ്യ. വർണക്കൂണുകളുടെ ലോകം മലയാളിക്കു തുറന്നു നൽകുക മാത്രമല്ല, ലയൺസ് മെയ്ൻ പോലുള്ള ഔഷധക്കൂണുകളുടെ കൃഷി ഉൾപ്പെടെ ഒട്ടേറെ പുത്തൻ ആശയങ്ങൾ കൊണ്ടുവരികയും ചെയ്യുന്നു "ഗോ ദി ഫൺ ഗൈ' ബ്രാൻഡിലൂടെ ആദം.