കർക്കടകക്കഞ്ഞിയും പത്തിലത്തോരനും

ആരോഗ്യദായകമായ പാരമ്പര്യ വിഭവങ്ങൾ

- എഴുമാവിൽ രവീന്ദ്രനാഥ്

കർക്കടകമെത്തും മുൻപേ സകല സൂപ്പർമാർക്കറ്റുകളിലും കഞ്ഞിക്കിറ്റുകൾ നിരക്കുകയായി. ആരോഗ്യസംരക്ഷണത്തിൽ ജാഗ്രതയുള്ള മലയാളികൾ ഈ മാസം കുടിച്ചുതീർക്കുന്നത് 30 കോടി രൂപയുടെ കർക്കടകക്കഞ്ഞിയാണ്. ഋതുഭേദത്തിനൊപ്പം ശരീരത്തെ പരിപക്വമാക്കാൻ സഹായകമാണ് കർക്കടകക്കഞ്ഞിയെന്നതിൽ സംശയമില്ല. എന്നാൽ വിപണിയിലെത്തുന്ന കർക്കടകക്കഞ്ഞിക്കൂട്ടുകളെ ഔഷധക്കഞ്ഞിക്കൂട്ട് എന്നു വിളിക്കുകയാവും ഭേദം.

പരമ്പരാഗത കർക്കടകക്കഞ്ഞിയിൽ തൊടികളിൽ സുലഭമായ സസ്യങ്ങളായിരുന്നു ചേരുവകൾ. എന്നാൽ ഇന്ന് അശ്വഗന്ധം (അമുക്കുരം) മുതൽ ദശമൂലം വരെയാണ് "ലേബൽ പ്രകാരം കഞ്ഞിക്കിറ്റുകളിലുള്ളത്. യഥാർഥ കർക്കടകക്കഞ്ഞി ലളിതമാണ്. ഈ പ്രഭാതഭക്ഷണം തയാറാക്കുന്നതെങ്ങനെയെന്നു നോക്കാം.