നടനവേദിയിലെ നിലയ്ക്കാത്ത ഗാനങ്ങൾ

വഴിവിളക്കുകൾ

-  പൂച്ചാക്കൽ ഷാഹുൽ

ചേർത്തലയിലെ തേവർ വട്ടമാണ് എന്റെ ജന്മദേശം. എന്റെ അത്താ കെ. അബു ഹനീഫ വലിയ കലാസ്നേഹിയായിരുന്നു. തിക്കുറിശ്ശി സുകുമാരൻ നായർ അക്കാലത്ത് എഴുതിയ പ്രസിദ്ധമായ നാടകഗാനങ്ങളും ത്യാഗരാജ ഭാഗവതരുടെ നാടകഗാനങ്ങളുമൊക്കെ അത്താ ഈണത്തോടെ പാടുമായിരുന്നു. അതു കേട്ടാണ് പാട്ടുകളോടുള്ള എന്റെ ഇഷ്ടം ആരംഭിക്കുന്നത്. ക്ഷേത്രാങ്കണങ്ങളിലെ നാടകങ്ങൾ കാണാൻ അത്ത പോകുമായിരുന്നു. കുട്ടിയായിരുന്ന എന്നെയും കൂടെ കൂട്ടും. 1957 ൽ ശിവാജി ഗണേശൻ അഭിനയിച്ച നാടകം കാണാൻ പൂച്ചാക്കലിൽ നിന്ന് നാൽപത് കിലോമീറ്റർ സൈക്കിൾ ചവിട്ടി ആലപ്പുഴയിലെ ശീമാട്ടി തിയറ്ററിൽ അത്താ എന്നെ കൊണ്ടുപോയിട്ടുണ്ട്. ഈ താൽപര്യങ്ങളാണ് എന്റെ ഉള്ളിൽ നാടകമോഹത്തിന്റെ തിരി കൊളുത്തിയത്. അമ്മാവനായ പൂച്ചാക്കൽ അബ്ദുൽ ഖാദർ നാടൻപാട്ടുകാരനായിരുന്നു. അങ്ങനെ കുട്ടിക്കാലം മുതൽ പാട്ടുകളുടെ ഒരു ലോകം എന്റെ ചുറ്റും ഉണ്ടായിരുന്നു.