പേരിന്റെ ചിഹ്നം

കഥക്കൂട്ട്

- തോമസ് ജേക്കബ്

ഏതു പ്രസ്ഥാനത്തിന്റെയും ആദ്യ വിജയം തിളങ്ങേണ്ടത് അതിന്റെ പേരിലും ലോഗോയിലുമാണ്. പേരു നന്നെങ്കിൽ യുദ്ധം പാതി ജയിച്ചു.

ഇന്ത്യയിൽ ഒരു പുതിയ പ്രസിദ്ധീകരണം ആരംഭിക്കാൻ പേരു റജിസ്റ്റർ ചെയ്യുന്നതിന് റജിസ്ട്രാർ ഓഫ് ന്യൂസ്പേപ്പേഴ്സ് ഇന്ത്യയ്ക്ക് (ആർഎൻഐ)-അപേക്ഷിച്ചാൽ ആ പേരിനെപ്പറ്റിയുള്ള അവരുടെ ഗവേഷണം ഈ തലമുറയിൽ ഒതുങ്ങുകയില്ല. ആ പേരിൽ പണ്ട് എന്നെങ്കിലും ഇവിടെ ഒരു പ്രസിദ്ധീകരണം ഉണ്ടായിരുന്നോ എന്ന് അവർ അന്വേഷിക്കും. അങ്ങനെ ഉണ്ടായിരുന്നെങ്കിൽ അതിന്റെ ഉടമസ്ഥരുടെ പിൻഗാമികളുടെ സമ്മതപത്രം വാങ്ങിവരേണ്ടിവരും.

"മനോരമ' ഇംഗ്ലിഷിൽ വാർത്താവാരിക ആരംഭിക്കാൻ തീരുമാനിച്ചപ്പോൾ അതിന്റെ പേരായി ആദ്യ എഡിറ്റർ വി.കെ.ബി.നായർ നിർദേശിച്ചത് This Week എന്നാണ്. This week എന്നല്ല The Week എന്നുതന്നെ പറയണമെന്ന് ആ ആലോചനാ യോഗത്തിലുണ്ടായിരുന്ന മനോരമയുടെ ഡൽഹി ബ്യൂറോ ചീഫ്ടി.വി.ആർ.ഷേണായ് ഇടപെട്ടു.

ആർഎൻഐയിൽ ചെന്നപ്പൊഴാണ് ആ പേരിൽ കൊൽക്കത്തയിൽ പണ്ട് ഒരു മാസിക ഉണ്ടായിരുന്നുവെന്നറിഞ്ഞത്. ഉടമസ്ഥരുടെ പിൻഗാമികളിൽ പെട്ട ഒരാൾ അന്ന് ഇവിടെ സ്റ്റേറ്റ് ബാങ്ക് ഓഫ് ട്രാവൻ കൂറിന്റെ മാനേജിങ് ഡയറക്ടറായിരുന്നുവെന്നത് ആ പേരു വിട്ടുകിട്ടുന്നതിന് വളരെ സഹായകമായി.