ഇറക്കിക്കെട്ടൽ

കഥക്കൂട്ട്

- തോമസ് ജേക്കബ്

മുൻപു ചെയ്ത ജോലിയെക്കാൾ അധികാരവും ശമ്പളവും കുറഞ്ഞ ജോലി സന്തോഷത്തോടെ ചെയ്യുന്ന എത്രപേർ ഉണ്ടാവും? കേരളത്തിന്റെ രാഷ്ട്രീയ ശ്രേണിയിൽ അങ്ങനെ കുറേപ്പേരുണ്ട്. ഇ. ഇക്കണ്ടവാരിയരായിരുന്നു അവരിൽ ആദ്യത്തെയാൾ. കൊച്ചിയിൽ 194849 ൽ പ്രധാനമന്ത്രിയായിരുന്ന അദ്ദേഹം പിന്നീട് 1949-50ൽ തിരു-കൊച്ചിയിൽ പറവൂർ ടി.കെ.നാരായണപിള്ള മന്ത്രിസഭയിൽ മന്ത്രിയായി (ആദ്യമൊക്കെ സംസ്ഥാന ഭരണാധികാരിക്കും പ്രധാനമന്ത്രി എന്നായിരുന്നു സ്ഥാനപ്പേര്. പിന്നീടാണ് അതു മുഖ്യമന്ത്രി എന്നായത്).

മന്ത്രിപദത്തിനുശേഷം അദ്ദേഹം തിരു കൊച്ചിയിലെ ഫുഡ് പ്രൊഡക്ഷൻ കമ്മിഷണർ ആയപ്പോൾ ഒല്ലൂരിൽ നിന്നുള്ള നിയമസഭാംഗത്വം രാജിവച്ചു. 1950ലെ ആ ഉപതിരഞ്ഞെടുപ്പിൽ കോൺഗ്രസ് തോറ്റുപോവുകയും ചെയ്തു.

കൊച്ചിയിൽ 1947ൽ പ്രധാനമന്ത്രിയായ പനമ്പിള്ളി 1948-49ൽ ഇക്കണ്ടവാരിയർ മന്ത്രിസഭയിൽ നിയമം, ധനമന്ത്രിയായെങ്കിലും പിന്നീട് മുഖ്യമന്ത്രിയും കേന്ദ്രമന്ത്രിയുമായി ഉയർന്നു.

തിരു-കൊച്ചിയിൽ 1952-53ൽ മുഖ്യമന്ത്രിയായിരുന്ന എ.ജെ.ജോൺ 195556ൽ പനമ്പിള്ളി മന്ത്രിസഭയിൽ ആഭ്യന്തര, ഭക്ഷ്യ, വനം മന്ത്രിയായി.