നിമിത്തമായത് കള്ളൻ പവിത്രൻ

വഴിവിളക്കുകൾ

- സോക്രട്ടീസ് കെ. വാലത്ത്

1980. പ്രീഡിഗ്രിക്കാലം. ഒരു വൈകുന്നേരം കോളജ് വിട്ട് എറണാകുളം സൗത്തിൽ ഞാൻ ബസ് കാത്തു നിൽക്കുന്നു. റോഡരികിൽ ഒരു കാഴ്ച കണ്ടു - തല കുഴിയിൽ താഴ്ത്തി വച്ച് കാലുകൾ ആകാശത്തേക്കുയർത്തി നിൽക്കുന്നൊരു അഭ്യാസി. പിച്ചപ്പാത്രവുമായി കാഴ്ചക്കാരിൽനിന്നു കാശ് ഇരക്കുന്ന ഒരു കുട്ടിയും. ശ്വാസം മുട്ടാറാവുമ്പോൾ അയാൾ മണ്ണിൽ കൈ അടിച്ച് ശബ്ദമുണ്ടാക്കും. കുട്ടി ചെന്ന് മണ്ണ് മാറ്റിക്കൊടുക്കും. അയാൾ ആശ്വാസത്തോടെ കുഴിയിൽ നിന്നു തല പുറത്തെടുക്കും.