കയ്യില്ലെങ്കിലും സ്വന്തംകാലിൽ ഉമ്മുകുൽസു

രണ്ടു കൈകളും ഇല്ലാതെയാണ് ഉമ്മു കുൽസു ജനിച്ചത്. കാലുകൾക്ക് രണ്ടിനും രണ്ടു നീളം. പക്ഷേ, ചെയ്യുന്ന ജോലികളെല്ലാം അവൾ കാലു കൊണ്ട് ചെയ്തു; ചിത്രരചനയടക്കം. ഭിന്നശേഷിയെ അതിജീവിച്ച് ചിത്രപ്രദർശനങ്ങളും വിത്തുപന നിർമാണവുമായി സ്വന്തം കാലിൽ നിൽക്കുന്ന ഉമ്മുകുൽസുവിന്റെ കഥ...

- ഉമൈബ

നാൽപതാമത്തെ വയസ്സിലാണ് ഏഴാമത്തെ കുട്ടിയായ ഉമ്മു കുൽസുവിനെ ഞാൻ പ്രസവിക്കുന്നത്. കുട്ടിയെ എന്നെ കാണിക്കാൻ ഡോക്ടർമാർക്കു മടിയായിരുന്നു. രണ്ടും കയ്യും ഇല്ല. കുഞ്ഞു കാലുകൾ രണ്ടിനും രണ്ടു തരത്തിലാണ് നീളം. ജനിച്ചപ്പോൾ കുട്ടി കരഞ്ഞതുമില്ല. ഈ കുട്ടിയെ നിങ്ങൾ എങ്ങനെ വളർത്തും, വേറെ ആർക്കെങ്കിലും കൊടുത്തൂടെ എന്നൊക്കെയായിരുന്നു ആശുപത്രിയിൽനിന്നു പറഞ്ഞത്. ഏഴു മക്കളെ പോറ്റണം. ഭർത്താവ് മുഹമ്മദ് ഹനീഫയ്ക്ക് മീൻ പിടിത്തമാണ്. ഞാനും വയലിൽ കൊയ്യാൻ പോയും കൂലിപ്പണിക്കു പോയുമൊക്കെയാണ് കുടുംബം നോക്കുന്നത്. ആ സാഹചര്യത്തിൽ എപ്പോഴും പരിചരണം ആവശ്യമുള്ള കുട്ടിയെ എനിക്കു ശരിക്കു നോക്കാൻ പറ്റുമോ, അവൾ ബാധ്യതയാകുമോ എന്നൊക്കെ എന്റെ ആങ്ങളമാരും സംശയം പറഞ്ഞു. പക്ഷേ, ഇരക്കാൻ പോകേണ്ടി വന്നാലും ഞാൻ അവളെ പോറ്റുമെന്നു തന്നെ എല്ലാവരോടും പറഞ്ഞു.