IISER ശാസ്ത്രപഠനത്തിന്റെ ഹൈവേ

രാജ്യത്ത് 7 ഐസറുകളേയുള്ളൂ. അവിടെ പ്രവേശനം നേടാനുള്ള പരീക്ഷയ്ക്ക് ചിട്ടയുള്ള, കണിശമായ തയാറെടുപ്പ് നിർബന്ധം

- എം.വി.സക്കറിയ

ശാസ്ത്രമേഖലയിൽ പ്രവർത്തിച്ച് തനിക്കും ലോകത്തിനും നേട്ടങ്ങൾ ഉണ്ടാക്കാൻ ആഗ്രഹിക്കുന്ന വ്യക്തിയാണോ നിങ്ങൾ, വസ്തുതകളുടെ ആഴത്തിലേക്കിറങ്ങി എന്നും പുതിയ കാര്യങ്ങൾ മനസ്സിലാക്കിക്കൊണ്ടേയിരിക്കാൻ ആഗ്രഹമുള്ളവരാണോ, നിലവിലുള്ളവ പഠിക്കുകയും മനസ്സിലാക്കിയതിനെക്കുറിച്ചു ഗാഢമായി മനനം ചെയ്തു പുതിയ കാര്യങ്ങൾ കണ്ടെത്താൻ ശ്രമിക്കുകയും പഠിച്ചതിനെയും കണ്ടത്തിയതിനെയും വിമർശനാത്മകമായി വിലയിരുത്തുകയും ചോദ്യം ചെയ്യുകയും ചെയ്യുന്നയാളാണോ, പ്രപഞ്ചത്തെക്കുറിച്ചു പുതിയ കാര്യങ്ങൾ കണ്ടെത്തുന്നതിൽ തല്പരരാണോ????...... എങ്കിൽ ഈ പഠനമേഖല നിങ്ങൾക്കുള്ളതാണ്.

"ഐസർ' എന്നാൽ

ശാസ്ത്രഗവേഷണത്തിലേക്ക് എത്തിച്ചേരാൻ ധാരാളം പാതകളുണ്ട്. അവയിൽ ഏറ്റവും മികച്ചൊരു വഴിയാണ് IISERലെ (Indian institute of Science Education and Research) ഇന്റഗ്രേറ്റഡ് പിജി പഠനം. ഐസർ ആപ്റ്റിറ്റ്യൂഡ് ടെസ്റ്റ് (IAT) എന്ന അഖിലേന്ത്യാ പ്രവേശന പരീക്ഷയിലൂടെയാണ് അഡ്മിഷൻ.

ഇന്റർ ഡിസിപ്ലിനറി ശാസ്ത്രപഠനവും ഗവേഷണവും പ്രോത്സാഹിപ്പിക്കുകയാണ് ഐസറുകളുടെ പ്രധാന ലക്ഷ്യം. സാധാരണ കോളേജുകളിൽനിന്നു വിഭിന്നമായി ഗവേഷണാന്തരീക്ഷത്തിലാണ് വിദ്യാർഥികൾ ഐസറുകളിൽ കഴിയുന്നത്. അഞ്ചു വർഷത്തെ പഠനത്തിനുശേഷം ഇന്ത്യയിലെയും വിദേശത്തെയും പ്രശസ്ത സ്ഥാപനങ്ങളിലേക്ക് ഗവേഷണത്തിനു പോകുന്നവരാണ് ഏറെയും. രാജ്യാന്തര പ്രശസ്തരായ അധ്യാപകർ, മികച്ച ലബോറട്ടറി സംവിധാനം, ആഗോളതലത്തിൽ പ്രവർത്തിക്കുന്ന പൂർവവിദ്യാർഥികളുടെ സഹകരണം എന്നിവയൊക്കെ ഐസറിന്റെ ആകർഷണീയതകളാണ്.