കൂട്ടമായ് ആക്രമിച്ചോ? അത് കടന്നലാ...

വസ്തുതകൾ

- വിജയകുമാർ ബ്ലാത്തൂർ

കടന്നൽക്കൂട് ഇളകിയതുപോലെ എന്നത് ഏറ്റവും ഗുരുതരമായ കൂട്ട ആക്രമണത്തെ സൂചിപ്പിക്കാനാണ് സധാ രണയായി ഉപയോഗിക്കാറ്. അതിനാൽ തന്നെ ഏതുതരം പ്രാണികൾ ആക്രമിച്ചാലും ആളുകൾ അതിനെ തെറ്റായി കടന്നൽ എന്നു പറയാറുണ്ട്. മലതേനീച്ച, പായി തേനീച്ച, പെരുന്തേനീച്ച എന്നൊക്കെ പേരുകളുള്ള തേനീച്ചക്കൂട്ടങ്ങളും അവയുടെ കൂട് പക്ഷികളോ ആളുകളോ നശിപ്പിക്കാൻ ശ്രമിച്ചാൽ അടുത്തുള്ളവരെയൊക്കെ ഓടിച്ച് കുത്തും.

ഊട്ടിയിലേക്ക് വിനോദയാത്രക്ക് പോയ ഒരു സംഘത്തിലെ യുവാവ് ഗൂഡല്ലൂരിനടുത്ത് വെച്ച് ഇത്തരത്തിൽ തേനീച്ചകളുടെ കുത്തേറ്റ് മരിച്ചുപോയത് ഈയിടെയാണ്. സെക്രട്ടറിയേറ്റിന്റെ രണ്ടാം നിലയിൽ, പുറത്ത് കൂടു വച്ചിരുന്ന തേനീച്ചകൾ ഇളകി ആളുകളെ കുത്തിയതും വാർത്തയായിരുന്നു. അപ്പോഴും കടന്നൽ എന്നു തന്നെയാണ് പല മാധ്യമങ്ങളിലും വാർത്തയായി നൽകിയത്. എന്നാൽ, തേനീച്ചകളെയാണ് ഇവിടെയൊക്കെ തെറ്റായി, കടന്നൽ എന്നു വിളിച്ചത്.

ഒരേ പൂർവികജീവിയിൽ നിന്ന് പരിണമിച്ചവരാണ് കടന്നലും തേനീച്ചയും എങ്കിലും ഇപ്പോൾ വലിയ ബന്ധമൊന്നും ഇല്ലാത്ത രണ്ടിനം പ്രാണികളാണവർ.