ഇനി വരും ഇലക്ട്രിക്ക് ട്രാവലർ

ഇന്ത്യയുടെ ഒപ്പം സഞ്ചരിച്ച വാഹനമാണ് ട്രാവലർ. അംബാസഡർ പോലെ നമ്മുടെ നിരത്തിന്റെ മുഖമുദ്രകളിലൊന്ന്. ആംബുലൻസ് മുതൽ ആഡംബര കാരവനുകൾ വരെ ട്രാവലർ ബോഡിയിൽ നിന്നുയർന്നു നമ്മുടെ നിരത്തുകൾ കീഴടക്കി. ഇപ്പോഴിതാ ലോകത്തിനു മുന്നിലേക്ക് തലയുയർത്തി പുതുഫീച്ചറുകളുമായി ട്രാവലറിന്റെ പുതുമുഖങ്ങൾ അവതരിച്ചിരിക്കുന്നു. അടുത്ത തലമുറയെ ലക്ഷ്യം വച്ചാണ് ടിവൺഎൻ എന്ന പ്ലാറ്റ്ഫോമിൽ രണ്ടു ട്രാവലറുകൾ ഫോഴ്സ് മോട്ടോഴ്സസ് അണിയറയിൽ ഒരുക്കുന്നത്.

- ട്രാവലറിന്റെ ഭാവിതലമുറ മോഡലുകൾ പുണെയിൽ അവതരിപ്പിച്ചു

നൂറുശതമാനം ഇലക്ട്രിക് ആക്കി മാറ്റാവുന്നതും നിലവിലെ ഡീസൽ എൻജിൻ തന്നെ ഉപയോഗിക്കാവുന്നതുമായ രണ്ടു മോഡലുകളാണ് അവതരിപ്പിച്ചത്. വർഷാവസാനം ഈ മോഡലുകൾ പുറത്തിറങ്ങും. പുതിയ ഡിസൈനിനോടൊപ്പം ഏറെ സെഗ്മെന്റ് ഫസ്റ്റ് ഫീച്ചറുകളും ഈ ട്രാവലറുകളുടെ മുഖമുദ്രയാണ്.