ഒറ്റനോട്ടം അതുമതി

ഉന്മേഷം നിറയുന്ന കണ്ണുകൾക്കായി ശ്രദ്ധിക്കേണ്ട കാര്യങ്ങളും കണ്ണിന് അഴകു കൂട്ടാനുള്ള വഴികളും

- അമ്മു ജൊവാസ്

എത്ര  നന്നായി ഒരുങ്ങിയാലും കണ്ണെഴുതിയില്ലെങ്കിൽ മുഖത്ത് എന്തോ കുറവ് തോന്നുമെന്നു നമുക്കറിയാം. മിഴിയഴക് നന്നായാൽ മുഖകാന്തിയിൽ അതു പ്രതിഫലിക്കും. പക്ഷേ, വാലിട്ടെഴുതിയതിലെ ചെറിയ പിഴവ് മതി, മുഖസൗന്ദര്യത്തിന്റെ തിളക്കം കുറയ്ക്കാൻ. അതുകൊണ്ടു തന്നെ കണ്ണുകളിൽ ഉന്മേഷവും തിളക്കവും സദാ നിലനിർത്താൻ പ്രത്യേക ശ്രദ്ധ പുലർത്തണം. ഉറക്കക്ഷീണം തങ്ങിനിന്നാലോ, കൺപോളകൾ വീങ്ങിയിരുന്നാലോ അതു പെട്ടെന്നു മുഖമാകെയുള്ള ക്ഷീണമായി തോന്നും.

കണ്ണുകളുടെ ഭംഗിക്ക് ഒരുക്കം മാത്രം പോര, ആരോഗ്യസംരക്ഷണത്തിനുള്ള കരുതലും വേണം. കണ്ണിന്റെ അഴകും ആരോഗ്യവും സംരക്ഷിക്കാനായി ശ്രദ്ധിക്കേണ്ട കാര്യങ്ങൾ അറിയാം.

കണ്ണിന്റെ ആരോഗ്യത്തിന്

പഴങ്ങളും പച്ചക്കറികളും ധാരാളം ആഹാരത്തിൽ ഉൾപ്പെടുത്തണം. നന്നായി വെള്ളവും കുടിക്കണം. വൈറ്റമിൻ എ, സി, ബീറ്റ കരോട്ടിൻ, ഒമേഗ ത്രീ ഫാ റ്റി ആസിഡ്, സിങ്ക് എന്നിവ കാഴ്ചപ്രശ്നങ്ങളിൽ നിന്നും രോഗങ്ങളിൽ നിന്നും സംരക്ഷണം നൽകും.

പയർവർഗങ്ങൾ, നട്സ് (നിലക്കടല, കശുവണ്ടി, വാൾനട്ട് എന്നിങ്ങനെയുള്ളവ), വിത്തുകൾ (ചിയ വിത്ത്, മത്തൻകുരു, ഫ്ലാക്സ് സീഡ് പോലുള്ളവ), നാരങ്ങ, ഓറഞ്ച്, ചീര, കാരറ്റ്, ബ്രോക്ലി തുടങ്ങിയവ കഴിക്കുന്നതു കണ്ണിന്റെ ആരോഗ്യം സംരക്ഷിക്കും.

കണ്ണിലെന്തെങ്കിലും പോയാൽ തിരുമ്മരുത്. പകരം ശുദ്ധമായ വെള്ളത്തിൽ കണ്ണു കഴുകുക. ചിലർക്കു കണ്ണു തിരുമ്മുന്നതു ശീലമാണ്. ഇതു മാറ്റിയെടുത്തില്ലെങ്കിൽ കയ്യിലെ പൊടിയും മറ്റും കണ്ണിലെത്തി അലർജി പ്രശ്നങ്ങൾ ഉണ്ടാകും.

വെയിലത്തിറങ്ങുമ്പോൾ സൺഗ്ലാസ്സസ് ഉപയോഗിക്കാൻ മടിക്കേണ്ട. യുവി രശ്മികളിൽ നിന്നു കണ്ണുകളെ സംരക്ഷിക്കാൻ മാത്രമല്ല, വരണ്ട കാറ്റും പൊടിയുമുള്ള ഇടങ്ങളിൽ പോകുമ്പോഴും ഗ്ലാസ്സ് വക്കണം. പുറത്തുപോയി വന്നാലുടൻ മുഖം കഴുകുന്നതിനൊപ്പം കണ്ണു കഴുകാനും ഓർക്കുക.

സ്ക്രീനിൽ അധികം നോക്കിയാൽ