ജയനിലയത്തിലെ ഡോ. പവർഫുൾ

ഇസ്താംബൂളിൽ നടന്ന ഏഷ്യൻ ക്ലാസിക് പവർലിഫ്റ്റിങ് ചാംപ്യൻഷിപ്പിൽ സ്വർണനേട്ടമണിഞ്ഞ എഴുപത്തിനാലുകാരി ഡോ. ജയശ്രീ ഗോപാലൻ

- അഞ്ജലി അനിൽകുമാർ

പുലർച്ചെ തന്നെ ആലപ്പുഴ കൈതവനയിലെ ജയ നിലയം ഉണരും. ആറരയോടെ ഡോ. ജയശ്രീ ഗോപാലൻ ജിമ്മിൽ എത്തിയിരിക്കും. മഴയും മഞ്ഞുമൊന്നും ഡോക്ടർക്കൊരു വിഷയമേയല്ല. എഴുപത്തിനാലിലും പതിനേഴിന്റെ ചുറുചുറുക്കോടെയിരിക്കുന്നതെങ്ങനെ എന്നു ചോദിച്ചാൽ ഡോക്ടർ പറയും, "മനസ്സു കൊണ്ടു ശരീരംകൊണ്ടും ഇപ്പോൾ അൻപതുകളിലേക്കു മടങ്ങിയെത്തിയിരിക്കുന്നു. ആരോഗ്യം നന്നായാൽ ബാക്കിയെല്ലാം വഴിയേ വരും' ഡോക്ടറുടെ വാക്കുകൾ നൂറു ശതമാനം ശരിയാണെന്നു തെളിയിക്കും ഷോക്കേസിൽ തലയെടുപ്പോടെ നിരന്നിരിക്കുന്ന മെഡലുകൾ. പവർലിഫ്റ്റിങ് ജില്ലാ തലം മുതൽ രാജ്യാന്തരതലം വരെ നേടിയ മെഡലുകളുണ്ട് ഇക്കൂട്ടത്തിൽ.

വെളിച്ചമേകിയ തിരിച്ചറിവ്

ഇസ്താംബുളിൽ നടന്ന ഏഷ്യൻ ക്ലാസിക് പവർലിഫ്റ്റിങ് ചാംപ്യൻഷിപ്പിൽ നേടിയ മെഡലുകൾ കയ്യിലെടുത്തുയർത്തി വിശേഷങ്ങൾ പറഞ്ഞുതുടങ്ങുമ്പോൾ ജയശ്രീ ഡോക്ടറുടെ വാക്കുകളിൽ അഭിമാനം നിറഞ്ഞു.

“ഓരോ ദിവസവും ജിമ്മിലേക്കു ഡ്രൈവ് ചെയ്യുമ്പോൾ മനസ്സിൽ ഒരേയൊരു ചിന്തയേയുള്ളൂ. തലേദിവസത്തേക്കാൾ മിടുക്കോടെ വർക്കൗട്ട് ചെയ്യണം. അനുവാദം ചോദിക്കാതെ ജീവിതത്തിലേക്കു കടന്നു വന്ന ജീവിതശൈലി രോഗങ്ങളോടും അമിതഭാരത്തോടും വിട പറയുക എന്ന ലക്ഷ്യത്തോടെയാണ് മൂന്നു വർഷം മുൻപു തിരുവമ്പാടിയിലെ കോർ ഫിറ്റ്നസ് ജിമ്മിലേക്ക് എത്തുന്നത്.