മിത്തുകൾ സയൻസിനെ സ്വാധീനിക്കുന്നതെങ്ങനെ?

ഹൃദയവും മിത്തും തമ്മിലുള്ള ബന്ധത്തെക്കുറിച്ച് വിശദീകരിക്കുന്നു ഹൃദയത്തെക്കുറിച്ചും രക്തചംക്രമണത്തെക്കുറിച്ചുമുള്ള അബദ്ധധാരണകൾ ഹാർവി എങ്ങനെ മാറ്റിക്കുറിച്ചുവെന്ന് വിശദീകരിക്കുന്നു. ശാസ്ത്രവും മിത്തും തമ്മിലുള്ള വ്യത്യാസത്തെക്കുറിച്ച് വിശദമാക്കുന്നു.

- ഡോ. യു. നന്ദകുമാർ

ലോകമെമ്പാടും നിലവിലുണ്ടായിരുന്ന മിത്ത് ഹൃദയത്തെ സംബന്ധിക്കുന്നതാണ്. ഹൃദയം ചിന്തയുടെയും സ്നേഹം, വാത്സല്യം, പണയം, ദുഃഖം തുടങ്ങി എല്ലാ വികാരങ്ങളുടെയും ഇരിപ്പിടമായി സങ്കല്പിച്ചുപോന്നു. ഹൃദയവുമായി ബന്ധപ്പെട്ട ഭാഷാപ്രയോഗങ്ങൾ നോക്കിയാൽ മതി, ഇത് മനസ്സിലാക്കാൻ. ഇത്ര ആഘോഷിക്കപ്പെട്ട മറ്റൊരു മനുഷ്യാവയവം ഇല്ലെന്നു തന്നെ പറയാം. മനസ്സിന്റെ കേന്ദ്രമായി കരുതപ്പെട്ട ഹൃദയത്തിന് ഒരു വികാരവും നേരിട്ടനുഭവിക്കാനാവില്ല എന്നത് ഞെട്ടിക്കുന്ന കണ്ടെത്തലായിരുന്നു.

ചാൾസ് ഒന്നാമന്റെ കൊട്ടാരത്തിൽ 1641-ൽ ഒരു വിശേഷ സംഭവം നടന്നു. ഐറിഷ് പ്രഭുവായ മോണ്ട്ഗോമറി വൈകൗണ്ടിന്റെ  19 വയസ്സുള്ള പുത്രന്റെ ഹൃദയത്തിൽ രാജാവ് സ്പർശിച്ചു. എന്നിട്ട് ചോദിച്ചു, “എന്തെങ്കിലും വൈഷമ്യമുണ്ടോ?” ഒന്നുമില്ലെന്നയാൾ ഉറപ്പു നൽകി. യുവാവ്, തന്റെ പത്താം വ യസ്സിൽ കുതിരപ്പുറത്തുനിന്ന് ഉന്തി നിൽക്കുന്ന പാറയിൽ വന്നു പതിക്കുകയും ഏതാനും വാരിയെല്ലുകൾ പൊട്ടി ആഴത്തിൽ മുറിവേൽക്കുകയും ചെയ്തു. മുറിവ് പഴുത്തു സങ്കീർണ്ണമായി. എങ്കിലും, കുട്ടി അദ്ഭുതകരമായി രക്ഷപ്പെട്ടു; പക്ഷേ, ഇടതുഭാഗത്ത് നെഞ്ചിൽ വിടവ് നിലനിന്നു. ഇതിലൂടെ ഹൃദയമിടിപ്പ് കാണാനാകും എന്നത് അ ക്കാലത്തെ അദ്ഭുതങ്ങളിലൊന്നായിരുന്നു. പത്തൊമ്പതാം വയസ്സിൽ അയാൾ യൂറോപ്യൻ പര്യടനം നടത്തുകയുണ്ടായി. മിടിക്കുന്ന ഹൃദയം നേരിട്ടു കാണുവാൻ വൻ ജനാവലിയായിരുന്നു പര്യടനം നടന്ന പട്ടണങ്ങളിലെല്ലാം തടിച്ചുകൂടിയത്. പര്യടനം വലിയ സാമ്പത്തിക ലാഭമുണ്ടാക്കിയെന്ന് പ്രത്യേകം പറയേണ്ടതില്ലല്ലോ. വില്യം ഹാർവിയിൽ നിന്ന് ഇക്കഥകൾ കേട്ട ചാൾസ് ഒന്നാമന് യുവാവിന്റെ ഹൃദയമിടിപ്പ് നേരിൽ കാണണമെന്ന ആഗ്രഹമുണ്ടായി. ഹാർവി അക്കാലത്തെ പ്രശസ്തനായ ഗവേഷകനും ചാൾസ് രാജാവിന്റെ ഭിഷഗ്വരനും ആയിരുന്നു. ഹൃദയത്തിന്റെ പ്രവർത്തനം കൃത്യമായി വിവരിക്കാൻ അദ്ദേഹത്തിന് കഴിഞ്ഞു. ധമനികളിലെ വികാസസങ്കോചങ്ങൾ ഹൃദയമിടിപ്പുമായി പൊരുത്തപ്പെട്ടു കാണുന്നുവെന്നും അദ്ദേഹം കണ്ടെത്തി. ഹൃദയത്തിന്റെ ഇടത്തെ കീഴറ ധമനികളിലേക്കും വലത് ശ്വാസകോശത്തിലേക്കും കേം പമ്പ് ചെയ്യുന്നതായും അദ്ദേഹത്തിന് മനസ്സിലായി.