ജയന്ത് വിഷ്ണു നാർലിക്കർ ഇന്ത്യൻ പ്രപഞ്ച ശാസ്ത്രത്തിന്റെ ശില്പി

ജയന്ത് വിഷ്ണു നാർലക്കറുടെ ശാസ്ത്ര ജീവിത ത്തെക്കുറിച്ചുള്ള അനുസ്മരണക്കുറിപ്പ്. പ്രപഞ്ചശാസ്ത്രത്തിൽ നാർലിക്കർ നൽകിയ സംഭാവനകളെക്കുറിച്ച് വിശദീകരിക്കുന്നു. സ്ഥിരസ്ഥിതി സിദ്ധാന്തത്തെ ക്കുറിച്ച് സവിസ്തരം ചർച്ച ചെയ്യുന്നു.

- ടൈറ്റസ് കെ മാത്യു. മുൻ വകുപ്പ് മേധാവി, ഫിസിക്സ് വിഭാഗം, കുസാറ്റ്

ജയന്ത് വിഷ്ണു നാർലിക്കർ, ഇന്ത്യൻ കോസ്മോളജിസ്റ്റുകളുടെ കുലപതി, 2025 മെയ് 20-നു പുലർച്ചെ വിടവാങ്ങി. പ്രപഞ്ചരഹസ്യം തേടിയ ഈ ശാസ്ത്രജ്ഞന് ഈ മഹാപ്രപഞ്ചം നൽകിയ വിടവാങ്ങൽ പ്രഭാതത്തിലെ പ്രകാശ കിരണങ്ങളുടെ അകമ്പടിയോടെയായിരുന്നു.

നാർലിക്കറിന്റെ തന്നെ സ്വപ്ന സാഫല്യമായ IUCAA എന്ന ലോകോത്തര ഗവേഷണസ്ഥാപനം സന്ദർശിക്കുന്ന ആർക്കും ഒരു ദീർഘദർശിയുടെ കരുതൽ നേരിട്ട് അനുഭവിക്കാൻ കഴിയും. സങ്കുചിതമായ ഒരു വ്യത്യാസവും കാണാതെ മുന്നിൽ കാണുന്ന ആരോടും സൗമ്യമായി പെരുമാറുന്ന മനുഷ്യസ്നേഹിയായിരുന്നു അദ്ദേഹം. പ്രഭാഷണങ്ങളും ഘനമേറിയ ചർച്ചകളും നടക്കുന്ന ഈ സ്ഥാപനത്തിന്റെ വരാന്തകളിൽക്കൂടി നിങ്ങൾ നടക്കുന്നുവെന്ന് വിചാരിക്കുക. പുഞ്ചിരിച്ചു കൊണ്ട് ഒരു മനുഷ്യൻ നിങ്ങളെ സമീപിച്ച് കുശലാന്വേഷണം നടത്തുന്നു. നിങ്ങളുടെ ഇവിടുത്ത താമസം സുഖമല്ലേ എന്ന് അന്വേഷിക്കുന്നു. സംശയിക്കേണ്ട, അത് സാക്ഷാൽ ജയന്ത് വിഷ്ണു നാർലിക്കർ തന്നെയായിരിക്കും. അതാണ് നാർലിക്കർ.