'n Geurige sukses uit Stilbaai se kalkgrond

Wallie en Trix Krumm het 18 jaar gelede hulle stukkie paradys van 40 hektaar langs die Goukourivier gekoop. Wallie was 'n besigheidsman en hulle het in Hermanus gewoon.

- Johan Victor

Trix sê dat indien enigiemand op daardie stadium sou vra waarmee hulle boer sou die antwoord doodeenvoudig wees "met klip", want soos almal weet is dit kalkklipwêreld. Min wetende dat hierdie einste kalkklip hulle sou lei na die truffelboerdery. Truffels hou van 'n pH van 7.9 en Rietpoel het 'n pH van 7.9.

Wallie was nog voltyds in sy beroep, maar dit was nie lank nie of hulle het besef dat hulle met iets sou moes boer, of hulle plasie word hersoneer van boerdery na residensieel.

Lewende hawe was buite die kwessie en hulle het olyfbome oorweeg, selfs gedink aan laventel en artisjok, wat toevallig soos onkruid op die plaas groei.

Op daardie stadium kontak Leon Potgieter hulle. Hy het destyds 'n maatskappy, African Truffles, in samewerking met dr. Paul Thomas in Engeland bestuur. Thomas het 'n doktorsgraad in truffels en hulle was op soek na 'n stukkie grond om in hierdie omgewing te huur vir 'n toetsboord.