ધુરંધરના ધૂમધડાકા...

દેશદ્રોહીઓ સામે ધુરંધર દેશપ્રેમીઓ... રણવીર સિંહ, આર. માધવન્, અક્ષય ખન્ના, અર્જુન રામપાલ, સંજય દત્ત.

- રઘુ જેટલી

રાહ તો એની આતુરતાથી જોવાઈ રહી હતી. મંગળવારે મુંબઈમાં એનું ટ્રેલર રજૂ કરવામાં આવ્યું. હવે પાંચ ડિસેમ્બરે રિલીઝ થશે. નામઃ ધુરંધર. ચાર મિનિટ આઠ સેકન્ડ્સના ટ્રેલરમાં ભારતનો ખુફિયા જાસૂસ (રણવીર સિંહ) પાકિસ્તાનમાં જઈને નાપાક ત્રાસવાદીઓ (અક્ષય ખન્ના, સંજય દત્ત, અર્જુન રામપાલ, વગેરે)ની કેવી વલે કરે છે એનો ચિતાર આપવામાં આવ્યો છે. ટ્રેલરની શરૂઆતમાં અર્જુન રામપાલ ભારતીય બહાદુર સિપાહીનું કમકમાં ઊપજે એવું ટૉર્ચર કરે છે. અને ધી એન્ડ આવે છે રણવીર સિંહના સંવાદથીઃ તમારા ફટાકડા ખતમ થઈ ગયા હોય તો હવે હું ધડાકા શરૂ કરું... આ ડાયલોગ બાદ રોમાંચક ઍક્શન સીન્સ જોવા મળે છે.