તેજીનો આશાવાદ કે આશાવાદની તેજી?

અર્થતંત્રના વિકાસનો આશાવાદ અને બજારોની તેજીનો આશાવાદ સતત વધી રહ્યો છે. આમાં રાજી થવા જેવું તો ખરું જ, પરંતુ સાવચેત પણ રહેવું સારું, કારણ કે ઘણી વાર તેજીના આશાવાદમાં જ રોકાણકારો સહિતના લાખો લોકો તણાઈ જતા હોય છે... તો તણાવા કરતાં સમજવામાં ધ્યાન આપીએ.

- જયેશ ચિતલિયા

જ્યાં જ્યાં નજર આપણી ઠરે, ત્યાં ત્યાં તેજી ભરી છે આશાવાદની... કવિ કલાપીની ક્ષમાયાચના સાથે આપણાં અર્થતંત્ર, બજારો અને લોકોની માનસિકતા પર નજર કરીએ તો, ભારતની ફાસ્ટેસ્ટ ગ્રોઈંગ ઈકોનોમી, શૅરબજારોના હાઈ ઈન્ડેક્સ અને એ હજી વધવાની આગાહી, સ્ટૉક્સના ઊંચા ભાવ, આઈપીઓની વણજાર અને એ છલકાવાના વિક્રમ, મ્યુચ્યુઅલ ફંડ્સની નવી-નવી ઑફર અને એસઆઈપી સહિતની યોજનાઓમાં એકધારો જમા થઈ રહેલો નાણાપ્રવાહ, સોના-ચાંદીના રેકૉર્ડ ભાવ ને એમાં વધતી ડિમાન્ડ અને રોકાણ, રિયલ એસ્ટેટના ભળતા જ વધતા ભાવ, ચારેકોર ચાલી રહેલું રિડેવલપમેન્ટ, ઈન્ફ્રાસ્ટ્રક્ચરનો વિકાસ, વધુ ને વધુ સ્ટાર્ટ-અપ્સનાં આગમન, જીડીપી ગ્રોથના સંકેત, ઘટી રહેલો ફુગાવો, વપરાશી ચીજો અને સર્વિસિસની સતત વૃદ્ધિ પામતી ડિમાન્ડ, જીએસટી દરોના કાપ બાદ કન્ત્રપ્શનને મળી રહેલો વેગ...

આવાં અનેક આર્થિક પરિબળો વચ્ચે રાજકીય તખ્તા પર મોદી સરકારને મળી રહેલી સફળતા અને સરકાર તરફથી લેવાઈ રહેલાં આર્થિક સુધારાનાં પગલાં (ઈકોનોમિક રિફોર્મ્સ), ગ્લોબલ સ્તરે રેટિંગના સુધારા તથા વેપાર કરારો મારફત ભારતની વધી રહેલી શાખ જેવાં પરિબળો આશાવાદ જગાવવામાં સફળતા મેળવી રહ્યાં છે અને આ આશાવાદનો વરસાદ આર્થિક તથા ઈન્વેસ્ટમેન્ટના જગતને નવી તેજી તરફ આગળ લઈ જઈ રહ્યો છે.

ઘોડા-ગધેડાનો ફરક સમજો