આવી નાની દુર્ઘટના પણ મોટી થઈ શકે છે...

હોનારત કુદરતી હોય કે માનવસર્જિત, એની ગંભીરતા ન સ્વીકારવી એ અક્ષમ્ય અપરાધ છે અને આવા કોઈ અકસ્માત માટે સામાન્ય પ્રજામાંથી કોઈ જવાબદાર હોય તો એના ‘ગુના’ સામે કાયદેસર પગલાં લેવાની પણ જરૂર છે.

- હીરેન મહેતા

અમદાવાદની પ્લેન દુર્ઘટના પાછળ ઉત્તરાખંડ અને પુણે જેવી નાની હોનારતના સમાચાર ક્યારેક ઢંકાઈ જાય છે. અમદાવાદમાં વિમાન તૂટી પડ્યું એમાં નિઃશંકપણે જાનમાલની વધુ ખુવારી થઈ છે, પરંતુ દરેક માનવજીવનું મૂલ્ય સરખું ગણીએ તો રવિવારના એક જ દિવસે થોડા કલાકના ગાળામાં પુણે તથા રુદ્રપ્રયાગ નજીકની ઘટના તરફ આંખ આડા કાન કરી શકાય એમ નથી.

ઉત્તરાખંડનો ઘણોખરો વિસ્તાર પહાડી છે, જ્યાં ભૂસ્ખલન અને હિમપ્રપાત બહુ સામાન્ય લેખાય છે. હિમાલયના પર્વતો એની છાશવારે રંગ બદલતી કુદરત માટે પંકાયેલા છે એટલે બીજાં પ્રાકૃતિક પરિબળોની જેમ વાતાવરણમાં પલટો પણ આ પ્રાંત માટે સામાન્ય જ ગણી શકાય. વળી, આ આખો પ્રદેશ તીવ્ર ભૂકંપની ભારોભાર શક્યતા ધરાવે છે. હિંદુ ધર્મમાં મોટું મહત્ત્વ ધરાવતાં ચાર ધામ ઉપરાંત ઉત્તરાખંડમાં બીજાં અનેક યાત્રાસ્થળો છે અને પર્વતારોહકો પણ અહીં ખાસ્સી મોટી સંખ્યામાં આવતા રહે છે. આ બધો સરવાળો ઉત્તરાખંડમાં અવારનવાર આફત નોતરે છે.