റുട്ടീൻ ഹെൽത്ത് ചെക്കപ്പുകൾ ആർക്കൊക്കെ.എപ്പോൾ, എന്തിന്?

ചെറിയ വേദനയോ അസ്വസ്ഥതയോ ഉണ്ടാകുമ്പോൾതന്നെ, ഒരു അടിസ്ഥാനവുമില്ലാതെ ടെസ്റ്റുകൾക്കും പരിശോധനകൾക്കും മുതിരുന്ന പ്രവണത വർധിച്ചുവരുന്നുണ്ട്. നിർഭാഗ്വവശാൽ ഇത് പലപ്പോഴും ഒരു വിപണി താൽപര്യംകൂടിയായി മാറിക്കൊണ്ടിരിക്കുകയാണ്. ഹെൽത്ത് ചെക്കപ്പുകളുടെ കാര്യത്തിൽ കണ്ടുവരുന്ന ചില തെറ്റായ പ്രവണതകൾ പരിശോധിക്കാം...

- 

'പ്രതിരോധമാണ് ചികിത്സയേക്കാൾ നല്ലത് എന്ന തത്ത്വം വൈദ്യശാസ്ത്രത്തിൽ അത്യന്താപേക്ഷിതമാണ്. രോഗങ്ങൾ ഗുരുതരമാകും മുമ്പ് കണ്ടെത്താനും ജീവിത ശൈലിയിൽ ആവശ്യമായ മാറ്റങ്ങൾ വരുത്തി ആരോഗ്യത്തോടെയിരിക്കാനും സഹായിക്കുന്ന ഏറ്റവും പ്രധാനപ്പെട്ട മാർഗമാണ് റുട്ടീൻ ഹെൽത്ത് ചെക്കപ്പുകൾ (Routine Health Check -ups). എന്നാൽ ഇന്ന് ആരോഗ്യപരിശോധനകളുടെ സമീപനത്തിൽ കണ്ടുവരുന്ന ചില പ്രവണതകൾ തിരുത്തപ്പെടേണ്ടതുണ്ട്. അവയിലേക്ക്...

അനാവശ്യ പരിശോധനകൾ

ചെറിയ വേദനയോ അസ്വസ്ഥതയോ ഉണ്ടാകുമ്പോൾ തന്നെ, ഒരു അടിസ്ഥാനവുമില്ലാതെ ശരീരം മുഴുവൻ സ്കാൻ ചെയ്യണം' എന്ന് രോഗികൾ ആവശ്യപ്പെടുന്ന പ്രവണത വർധിച്ചു വരുന്നുണ്ട്. നിർഭാഗ്യവശാൽ ആവശ്യം പലപ്പോഴും ഈ ഒരു വിപണി താൽപര്യമായി (Market Trend) മാറിക്കൊണ്ടിരിക്കുകയാണ്.

മാനദണ്ഡമില്ലാത്ത പരിശോധനകൾ: പ്രായം, ലിംഗ ഭേദം, കുടുംബ പശ്ചാത്തലം, നിലവിലെ ആരോഗ്യസ്ഥിതി എന്നിവയൊന്നും കണക്കിലെടുക്കാതെ, അനാവശ്യമായ നിരവധി പരിശോധനകൾ (Screening Tests) നടത്തുന്നത് ശാസ്ത്രീയമല്ല. ഉദാഹരണത്തിന്, ഒരു പ്രത്യേക പ്രായം കഴിയുമ്പോൾ മാത്രം ആവശ്യമുള്ള പരിശോധനകൾ (മാമോഗ്രാം, കൊളോണോസ്കോപ്പി തുടങ്ങിയവ) അതിനുമുമ്പ് നടത്തുന്നത് രോഗിയുടെ സമയവും പണവും പാഴാക്കിക്കളയുക മാത്രമല്ല ചെയ്യുന്നത്, മറിച്ച് തെറ്റായ പോസിറ്റിവ് ഫലങ്ങളിലേക്ക് നയിക്കാനും സാധ്യതയുണ്ട്.

മാനസിക സമ്മർദം: അത്തരം ഫലങ്ങൾ, രോഗമില്ലാത്ത വ്യക്തികളിൽ പോലും അമിത മാനസിക സമ്മർദവും അനാവശ്യ തുടർപരിശോധനകളും ചികിത്സകളും വരുത്തി വെക്കും.

റൂട്ടീൻ ചെക്കപ്പുകൾ പ്രയോജനകരമാകുന്നത് എപ്പോൾ?

ഹെൽത്ത് ചെക്കപ്പുകൾ പ്രയോജനകരമാകണമെങ്കിൽ, അത് ശാസ്ത്രീയ മാനദണ്ഡങ്ങൾ പാലിച്ചു കൊണ്ടുള്ളതാകണം;

1. വ്യക്തിഗത സമീപനം: ഓരോ വ്യക്തിയുടെയും പ്രായം, ലിംഗഭേദം, ജീവിതശൈലി (പുകവലി, മദ്യപാനം), കൂടുംബത്തിൽ പാരമ്പര്യമായിട്ടുള്ള രോഗങ്ങൾ എന്നി വ പരിഗണിച്ച് ഡോക്ടറുടെ നിർദേശപ്രകാരം മാത്രം ആവശ്യമുള്ള പരിശോധനകൾ നടത്തുക.