കാസ്പിയൻ തീരത്തെ സ്വപ്നഭൂമി

കാസ്പിയൻ തടാകത്താലും കരഭൂമികളാലും ചുറ്റപെട്ട ഏഷ്യയുടെയും യൂറോപ്പിന്റെയും അതിർത്തിയിലുള്ള അസർബൈജാൻ എന്ന കൊച്ചു രാജ്യത്തിലേക്കൊരു യാത്ര...കാസ്പിയൻ തടാകത്താലും കരഭൂമികളാലും ചുറ്റപെട്ട ഏഷ്യയുടെയും യൂറോപ്പിന്റെയും അതിർത്തിയിലുള്ള അസർബൈജാൻ എന്ന കൊച്ചു രാജ്യത്തിലേക്കൊരു യാത്ര...

- ഡോ. അരുൺ എസ്. നായർ ഐ.എ.എസ്

86,000ലോമീറ്റർ മാത്രം വിസ്തീർണമുള്ള, 500 കിലോമീറ്ററോളം തെക്ക്-വടക്കും കിഴക്ക്-പടിഞ്ഞാറും ദൈർഘ്യമുള്ള കാസ്പിയൻ തടാകത്താലും കരഭൂമികളാലും ചുറ്റപ്പെട്ട ഏഷ്യയുടെയും യൂറോപ്പിന്റെയും അതിർത്തിയിലുള്ള, ഇന്ത്യക്കാർക്ക് ഇ-വിസ കിട്ടുന്ന അസർബൈജാൻ എന്ന കൊച്ചു രാജ്യമാണ് ലക്ഷ്യം. വിമാന ടിക്കറ്റുകളും ഹോട്ടൽ ബുക്കിങ്ങിന്റെ പകർപ്പും ഒക്കെയുണ്ടെങ്കിൽ 30 ഡോളറിന് ടൂറിസ്റ്റ് വിസ ലഭ്യമാകും, അതും അഞ്ചു ദിവസത്തിനുള്ളിൽ. വിമാന ടിക്കറ്റ് ഉൾപ്പെടെ ആകെ ചെലവ് 65,000 രൂപ മാത്രം.

ആശങ്കകൾക്കൊടുവിൽ

തിരുവനന്തപുരത്തുനിന്ന് അബൂദബി വഴി അസർബൈജാൻ തലസ്ഥാനമായ ബകുവിലേക്ക്. വിമാനമിറങ്ങി ഇമിഗ്രേഷൻ കൗണ്ടറിൽ തെല്ല് ഭയത്തോടെയാണ് ചെന്നത്. ഓപറേഷൻ സിന്ദൂർ സമയത്ത് പാകിസ്താനെ തുറന്നു പിന്തുണച്ചതിനെ തുടർന്ന് ഇന്ത്യ-അസർബൈജാൻ ബന്ധം അല്പം വഷളായിരുന്നു. ഇമിഗ്രേഷൻ ഓഫിസർ പേരുമാത്രം ചോദിച്ച് വെൽക്കം ടു അസർബൈ ജാൻ" എന്ന് പറഞ്ഞ് കടത്തി വിട്ടു. വലുപ്പംകൊണ്ട് ചെറുതാണ് ഹെയ്ദർ അലിയേവ് അന്താരാഷ്ട്ര വിമാനത്താവളം. അത്യാവശ്യത്തിനുള്ള തുക എക്സ്ചേഞ്ച് ചെയ്ത്, മൊബൈൽ സിം ആക്ടിവേറ്റ് ചെയ്ത് പുറത്തേക്ക്.

എയർപോർട്ടിൽ നിന്ന് സിറ്റി സെന്ററിലേക്ക് എക്സ്പ്രസ് ബസുകളുണ്ട്. പൊതുഗതാഗത സംവിധാനത്തിന് ബാക്കികാർട്ട് (Bakikart) എന്ന പ്ലാസ്റ്റിക് കാർഡ് കിട്ടും. ആവശ്യത്തിന് റീചാർജ് ചെയ്താൽ കുറഞ്ഞ ചെലവിൽ യാത്ര ചെയ്യാം. താമസത്തിന് എല്ലായിടത്തും ഹോസ്റ്റലുകളാണ് തിരഞ്ഞെടുത്തത്. ഏറ്റവും ഉചിതമായ സ്ഥലത്ത് ചെലവ് കുറച്ച് താമസിക്കാൻ ഏറ്റവും മികച്ച ഓപ്ഷൻ ഇതുതന്നെ.

ഇലപൊഴിയും കാലം

സെപ്റ്റംബർ മാസം അസർ ബൈജാനിൽ ശിശിരകാലമാണ്. ഇലകൾ പൊഴിക്കാൻ തയാറായി നിൽക്കുന്ന ചിനാർ മരങ്ങളാണ് ബകു നഗരത്തിലാകെ. യൂറോപ്യൻ നഗരങ്ങൾക്ക് സമാനമാണ് ഇവിടം. പഴമയുടെയും പുതുമയുടെയും വാസ്തുശൈലിയും പ്രൗഢിയും അതേ രീതിയിൽസംരക്ഷിച്ചിട്ടുണ്ട്. ബകു യൂനിവേഴ്സിറ്റി കെട്ടിടങ്ങളും ഓൾഡ് സിറ്റിയുമെല്ലാം വർഷങ്ങളുടെ ചരിത്രം പറയുന്ന വയാണ്. പഴയ സോവിയറ്റ് യൂനിയന്റെ പ്രതാപകാലത്ത് കെട്ടിപ്പൊക്കിയ കെട്ടിടങ്ങളാണ് ഇവയിൽ പലതും.