കുട്ടികളോട് വേണ്ട, ഈ വാക്കുകൾ

ജെന്റിൽ പാരന്റിങ്ങിനെ ഗൗരവപൂർവം കാണുന്ന ഇക്കാലത്ത് മാതാപിതാക്കൾ പറയാനും ചെയ്യാനും പാടില്ലാത്ത ചില കാര്യങ്ങളിതാ...

- ഡോ. സോജി അന്ന ഫിലിപ് Consultant Clinical Psychologist, Kochi

വീടകമാണ് കുട്ടികളുടെ ആദ്യ പാഠശാല. കുട്ടിയുടെ വ്യക്തിത്വം രൂപപ്പെടുന്നതിൽ പ്രധാന പങ്കുവഹിക്കുന്നയിടം. കുട്ടികളെ വളർത്തുമ്പോൾ മാതാപിതാക്കളും വീട്ടിലെ മുതിർന്നവരും നിരവധി കാര്യങ്ങൾ ശ്രദ്ധിക്കേണ്ടതുണ്ട്. ജെന്റിൽ പാരന്റിങ്ങിനെ ഗൗരവപൂർവം കാണുന്ന ഇക്കാലത്ത് മാതാപിതാക്കൾ പറയാനും ചെയ്യാനും പാടില്ലാത്ത നിരവധി കാര്യങ്ങളുണ്ട്. അവയിൽ ചിലതിലേക്ക്...

നിരുത്സാഹപ്പെടുത്തരുത്

'നിനക്കിത് ചെയ്യാൻ കഴിയില്ല' എന്ന് ഒരു കാര്യത്തെ ചൊല്ലിയും കുട്ടികളോട് പറയരുത്. അത് അവരുടെ ആത്മവിശ്വാസം തകർക്കും. എപ്പോഴും അവർക്ക് അവസരം കൊടുക്കുക. തെറ്റുകൾ വരുത്താനും അവതിരുത്താനും ഇടം കൊടുക്കുക. ഓരോ ചെറിയ തെറ്റിനുപോലും കുട്ടിയെ കുറ്റപ്പെടുത്തുന്ന പ്രവണത ഒഴിവാക്കാം. അത് അവരുടെ ആത്മവിശ്വാസം തകർക്കുന്നതോടൊപ്പം താൻ കൊള്ളാത്തവനാണന്ന സ്വയം തോന്നലുണ്ടാകാനിടയാക്കും.

ഒഴിവാക്കാം താരതമ്യം

മറ്റൊരാളുമായി താരതമ്യം ചെയ്യാതിരിക്കുക. ഓരോ കുട്ടിയും വ്യത്യസ്തരാണ്. മുന്നേറാനുള്ള വാശിയുണ്ടാകും എന്ന തെറ്റിദ്ധാരണയിലാണ് മാതാപിതാക്കൾ താരതമ്യത്തിന് തുനിയുക. എന്നാൽ, ഈ പ്രവണത നല്ലതല്ല. തന്റെ കഴിവുകൾ മറ്റൊരാളെ തോല്പിക്കാനാണ് ഉപയോഗിക്കേണ്ടത് എന്ന തിരിച്ചറിവാകും അവർക്ക് ലഭിക്കുക.

പാടില്ല, പരിഹാസം

കുട്ടികളെ ബോഡി ഷെയ്മിങ് ചെയ്യുന്നതിൽ പലപ്പോഴും മുന്നിൽ നിൽക്കുന്നത് മാതാപിതാക്കളാകും. കുറവുകളുടെ പേരിലും തെറ്റുകളുടെ പേരിലും തമാശക്കുപോലും പരിഹസിക്കാതിരിക്കുക പരിഹാസപ്പേരുകൾ പലർക്കും ആദ്യം കിട്ടുന്നതും വീട്ടിൽ നിന്നു തന്നെ. ഇതൊക്കെ കുട്ടികളുടെ ആത്മാഭിമാനത്തെ മുറിപ്പെടുത്തും. അവരുടെ അബദ്ധങ്ങൾ മറ്റുള്ളവരുടെ മുന്നിൽ പർവതീകരിക്കാതിരിക്കുക. കുഞ്ഞുങ്ങളുടെ സംശയങ്ങളെയും പരിഹസിക്കാതിരിക്കുക. തെറ്റ് തിരിച്ചറിയാനും തിരുത്താനും കുഞ്ഞുങ്ങളെ സഹായിക്കുകയാണ് മാതാപിതാക്കൾ ചെയ്യേണ്ടത്. അത് അവരെ കുറ്റപ്പെടുത്തിക്കൊണ്ടാവരുതെന്ന് മാത്രം.