ദൈവത്തിന്റെ കെ

അയ്യായിരത്തിലധികം രോഗികൾക്കും കൂട്ടിരിപ്പുകാർക്കും അന്നം നൽകിയും തെരുവിൽ ഉപേക്ഷിക്കപ്പെട്ടവർക്ക് 'നവജീവൻ ട്രസ്റ്റി'ലൂടെ അഭയം നൽകിയും കരുണയുടെ മനുഷ്യരൂപമായി മാറിയിരിക്കുകയാണ് പി.യു. തോമസ്...

- ഷെബീൻ മെഹബൂബ്

ഒരു വലിയ മനുഷ്യന്റെ ജീവിതാനുഭവങ്ങൾ എങ്ങനെ ഒരു ജനസമൂഹത്തിന് തണലും ആശ്വാസവുമാകും എന്നതിന്റെ നേർസാക്ഷ്യമാണ് കോട്ടയം ആർപ്പൂക്കര വില്ലൂന്നി സ്വദേശി പി.യു. തോമസ്. കോട്ടയത്തുകാർക്ക് അദ്ദേഹം വെറും തോമസല്ല, 'നവജീവൻ തോമസേട്ടൻ' ആണ്. ദിവസവും അയ്യായിരത്തിലധികം രോഗികൾക്കും കൂട്ടിരിപ്പുകാർക്കും അന്നം നൽകിയും തെരുവിൽ ഉപേക്ഷിക്കപ്പെട്ടവർക്ക് നവജീവൻ ട്രസ്റ്റി'ലൂടെ അഭയവും ജീവിതവും നൽകിയും ഈ സാധാരണക്കാരൻ കേരളത്തിന്റെ കാരുണ്യമുഖമായി മാറുന്നു.

വിശപ്പിന്റെ വേദനയിൽ പിറന്ന ദൗത്യം

പി.യു. തോമസിന്റെ ജീവിതത്തിലെ വഴിത്തിരിവ് കുഞ്ഞു നാളിലെ ആശുപത്രി അനുഭവത്തിൽ നിന്നായിരുന്നു. അഞ്ചാം ക്ലാസിൽ പഠിക്കവെ, അദ്ദേഹം കോട്ടയം മെഡിക്കൽ കോളജ് ആശുപത്രിയിൽ രോഗബാധിതനായി അഡ്മിറ്റായ കാലം.

തൊട്ടടുത്ത കിടക്കയിൽ നോക്കാൻ ആരുമില്ലാത്ത രാമചന്ദ്രൻ എന്ന രോഗി വിശന്നു കരയുന്നത് ആ ബാലന്റെ മനസ്സിൽ ആഴത്തിൽ മുറിവേൽപിച്ചു. അന്നത്തെ പ്രയാസമേറിയ കാലത്ത്, വീട്ടിൽ നിന്ന് വരുമ്പോൾ രാമചന്ദ്രനു കൂടിയുള്ള ഭക്ഷണം കൊണ്ടുവരാൻ അമ്മയോട് തോമസ് ആവശ്യപ്പെട്ടു. ഓപറേഷൻ കഴിഞ്ഞ് തോമസ് മടങ്ങിയെങ്കിലും രാമചന്ദ്രൻ മരണത്തിന് കീഴടങ്ങി.

ആ സംഭവം തോമസിന്റെ മനസ്സിൽ മായാതെനിന്നു. അന്നു മുതൽ ആലംബഹീനരായ മനുഷ്യരോട്, വിശേഷിച്ച് രോഗികളോട് അദ്ദേഹത്തിന് വല്ലാത്ത അലിവും അനുകമ്പയും വളർന്നുവന്നു.

മെഡിക്കൽ കോളജിലെ അറ്റൻഡർ, രോഗികളുടെ രക്ഷകൻ

ഇരുപതാം വയസ്സിൽ കോട്ടയം മെഡിക്കൽ കോളജിൽ അറ്റൻഡറായി ജോലി ലഭിച്ചത് തോമസിന് ഒരു നിയോഗമായി തോന്നി. അത് തന്റെ ജീവ കാരുണ്യ പ്രവർത്തനങ്ങൾക്ക് ലഭിച്ച അവസരമായി അദ്ദേഹം കണ്ടു. ഔദ്യോഗിക ജോലിക്കൊപ്പം കാരുണ്യ പ്രവർത്തനങ്ങളിലും അദ്ദേഹം ശ്രദ്ധിച്ചു.