ശ്രീധരന്റെ ചായക്കട അഥവാ വിശപ്പിന്റെ ബാർട്ടർ സിസ്റ്റം

കണ്ണൂർ-കോഴിക്കോട് അതിർത്തിയിൽ പൊയിലൂർ തിരുത്തിയിൽ ശ്രീധരന്റെ കടയിലെത്തിയാൽ പതിറ്റാണ്ടുകൾ പിന്നോട്ടു പോയ പ്രതീതിയാണ്. ബാർട്ടർ സമ്പ്രദായം നിലനിൽക്കുന്ന കടയിൽ തേങ്ങയും വാഴക്കുലയും കൊടുത്ത് വിശപ്പും ദാഹവുമകറ്റാം...

- സന്ദീപ് ഗോവിന്ദ്

ഒരു തേങ്ങ കൊടുത്താൽ പുഴുക്കും പൊറോട്ടയും കഴിക്കാം. വാഴക്കുലയാണങ്കിൽ പുഴുക്കും പൊറോട്ടയും ചായയും കഴിച്ചാലും ബാക്കി പണം തിരിച്ചുതരും. കണ്ണൂർ -കോഴിക്കോട് അതിർത്തിയിൽ പൊയിലൂർ തിരുത്തിയിൽ ശ്രീധരന്റെ കടയിലെത്തിയാൽ പതിറ്റാണ്ടുകൾ പിന്നോട്ടു പോയ പ്രതീതിയാണ്. ബാർട്ടർ സമ്പ്രദായം നിലനിൽക്കുന്ന കടയിൽ തേങ്ങയും വാഴക്കുലയും കൊടുത്ത് വിശപ്പും ദാഹവുമകറ്റാം. രാവിലെ മുതൽ സ്ഥിരം സന്ദർശകരുടെ തിരക്കാണിവിടെ.

തിരുത്തിയിൽ തോട് കടന്ന് കോഴിക്കോട് ജില്ലയിൽനിന്ന് കൃഷിപ്പണി കഴിഞ്ഞ് ക്ഷീണമകറ്റാൻ സത്യനെത്തും. കെ യിൽ ഒന്നോ രണ്ടോ തേങ്ങയുണ്ടാവും. പുഴുക്കും പൊറോട്ടയും ചായയും കഴിച്ച് ഉഷാറായി മടങ്ങും. തെങ്ങുകയറ്റം കഴിഞ്ഞ് കൊല്ലന്റവിടെ ബാലനും കടയിലെത്തി തേങ്ങ നൽകി വിശപ്പകറ്റി ശ്രീധരന്റെ ബാർട്ടർ സിസ്റ്റത്തിന്റെ ഭാഗമാകും. പതിറ്റാണ്ടുകളായി ഇതേ സമ്പ്രദായമാണ് തിരുത്തിയിൽ ചായക്കടയിൽ.

നാലു പതിറ്റാണ്ടിന്റെ പാരമ്പര്യം