രമണീയം രമണിക്കുട്ടിയുടെ ജീവിതം

എഴുത്ത്, വര, യാത്ര, ജീവകാരുണ്യ പ്രവർത്തനങ്ങൾ തുടങ്ങിയവയുമായി തിരക്കിലാണ് രമണിക്കുട്ടി. 80-ാം വയസ്സിലും സർഗാത്മകമായ തന്റെ കഴിവിനെ പരിപോഷിപ്പിക്കുന്ന ഈ അമ്മയുടെ ജീവിതമറിയാം...

- കെ.എം. ഫൈസൽ

രമണിക്കുട്ടിക്ക് ജീവിതമിപ്പോൾ വരയുടെയും എഴുത്തിന്റെയും കാലമാണ്. വരയാണോ എഴുത്താണോ ഏറ്റവും പ്രിയപ്പെട്ടത് എന്നു ചോദിച്ചാൽ രമണിക്കുട്ടി പറയും, രണ്ടു കണ്ണുകളിൽ എതാണോ കൂടുതലിഷ്ടം എന്ന ചോദ്യം പോലെയാണ് അതെന്ന്. പ്രായമായാൽ ഒന്നിനും കഴിയില്ലെന്ന് പറഞ്ഞ് അലസമായി വിശ്രമ ജീവിതം നയിക്കുന്നവർക്കിടയിൽ വ്യത്യസ്തയാണ് ഇവർ.

80-ാം വയസ്സിലും തന്റെ സർഗാത്മകതയെ പരിപോഷിപ്പിക്കുകയാണ് കൊല്ലം ചാത്തന്നൂർ തിരുമുക്ക് സ്വദേശി രമണിക്കുട്ടി. ബാല്യകാലത്തിൽ ആഗ്രഹിച്ചതെല്ലാം വിശ്രമ ജീവിതത്തിൽ പ്രാവർത്തികമാക്കുകയാണ്.

എഴുത്തുപുരയിലൊളിപ്പിച്ച അത്ഭുതങ്ങൾ

വീടിന് സമീപം നിർമിച്ച രമണിക്കുട്ടിയുടെ എഴുത്തുപുരയിലേക്ക് കയറിച്ചെല്ലുമ്പോൾ ഏതൊരാളും ഒന്ന് അമ്പരക്കും. വീടിനകത്ത് പ്രവേശിക്കണമെങ്കിൽ രമണിക്കുട്ടി വരച്ച ചിത്രങ്ങൾ വകഞ്ഞു മാറ്റണം. യാഥാസ്ഥിതിക കുടുംബമായതിനാൽ ചെറുപ്പത്തിൽ ജീവിതത്തിൽ നേരിട്ട പ്രതിസന്ധികൾ കാരണം നേടാൻ കഴിയാത്ത ആഗ്രഹങ്ങളാണ് റിട്ടയർമെന്റിന് ശേഷം അവർ എത്തിപ്പിടിക്കുന്നത്.

2000ത്തിൽ വിദ്യാഭ്യാസ വകുപ്പിൽ പൂജപ്പുര എസ്.സി .ഇ.ആർ.ടിയിൽനിന്ന് അക്കൗണ്ട്സ് ഓഫിസറായി റിട്ടയർ ചെയ്തശേഷം കഴിഞ്ഞ കാൽ നൂറ്റാണ്ടായി എഴുത്തിലും വരയിലും പഠനത്തിലും സാമൂഹികസേവന രംഗത്തും മാതൃഭാഷക്ക് വേണ്ടിയുള്ള പോരാട്ടത്തിലും സജീവമാണ്. പത്താം വയസിൽത്തന്നെ തനിക്ക് പഠനത്തിൽ എവിടെയെത്തണമെന്ന നിശ്ചയദാർഢ്യമുണ്ടായിരുന്നെങ്കിലും വിധി മറ്റൊന്നായിരുന്നു. തന്റെ താഴെ നാലു പെൺകുട്ടികൾ വളർന്നു വരുന്ന കാരണത്താൽ വീട്ടുകാരുടെ നിർബന്ധത്തിനു വഴങ്ങി 17-ാം വയസ്സിൽ വിവാഹിതയാവകയായിരുന്നു.