മധുരമീ കാൻഡി

ശ്രീലങ്കയുടെ തുടിക്കുന്ന ഹൃദയമാണ് കാൻഡി. കൊളംബോയിൽനിന്ന് ഏകദേശം 100 കിലോമീറ്റർ അകലെയാണ് മനോഹരമായ ഈ മലയോര നഗരം സ്ഥിതിചെയ്യുന്നത്

- രമ്യ എസ് ആനന്ദ്

നുവാര എലിയയിൽ നിന്ന് കാൻഡിയിലേക്കുള്ള യാത്രതന്നെ അതി മനോഹരമായ ഒരു സീനിക് സൈറ്റാണ്. ബസിലെ തട്ടുപൊളിപ്പൻ ശ്രീലങ്കൻ സിനിമാ ഗാനങ്ങൾ കേട്ട് ഒരു യാത്ര. തേയിലക്കാടുകളും വെള്ളച്ചാട്ടങ്ങളും നിറഞ്ഞ താഴ്വരകൾ. നീലയും പച്ചയും ഇടകലർന്ന മലനിരകൾ..

ശ്രീലങ്കയുടെ തുടിക്കുന്ന ഹൃദയമാണ് കാൻഡി. തലസ്ഥാന നഗരമായ കൊളംബോയിൽ നിന്ന് ഏകദേശം 100 കിലോ മീറ്റർ അകലെയാണ് മലയോര നഗരമായ കാൻഡി സ്ഥിതി ചെയ്യുന്നത്. കാൻഡിയുടെ തെരുവുകൾ നിറയെ കൊളോണിയൽ കെട്ടിടങ്ങളാണ്. ശ്രീലങ്കയിലെ രണ്ടാമത്തെ വലിയ നഗരമാണിത്. ശ്രീലങ്കൻ സാരിയായ ഓ സാരിയുടെ സ്ഥലം.

ശ്രീലങ്കയുടെ മുഖമുദ്രയായ വൃത്തിയും അടുക്കും ഈ നഗരത്തിലും കാണാം. നഗരമധ്യത്തിലെ പുരാതന പള്ളിയുടെ സമീപമാണ് ഞങ്ങൾ താമസിക്കുന്ന ഹോട്ടൽ. ഞാനും മകളും ഭർത്താവും അടങ്ങുന്ന മൂവർസംഘം എത്തിയ ഉടൻ നഗരക്കാഴ്ചകൾ കാണാനിറങ്ങി.

രാജേഷ് കണ്ണ്

നടന്നു നടന്നെത്തിയത് പ്രശസ്തമായ ബുദ്ധക്ഷേത്രത്തിനു മുന്നിൽ. ദലത മാലിഗാവ ക്ഷേത്രം. ടൂത് റെലീക് ടെമ്പിൾ എന്ന് പറഞ്ഞാലാണ് കൂടുതൽ അറിയുക. ബുദ്ധന്റെ ഒരു പല്ല് സൂക്ഷിച്ചിരിക്കുന്നത് ഇവിടെയാണ്. പഴയ രാജകൊട്ടാരത്തിന് നടുവിലാണ് ക്ഷേത്രം സ്ഥിതി ചെയ്യുന്നത്.

രാജേഷ് കണ്ണ് എന്ന തമിഴ് വംശജനെ പരിചയപ്പെട്ടത് ഈ ക്ഷേത്രത്തിൽ വെച്ചാണ്. ക്ഷേത്രത്തിന്റെ നോട്ടക്കാരിൽ ഒരാൾ എന്ന നിലയിലാണ് രാജേഷ് ഞങ്ങളെ പരിചയപ്പെടാൻ വരുന്നത്. മറ്റൊരു നാട്ടിൽ ഒരാൾ അമിതമായി നമ്മെ സഹായിക്കുമ്പോൾ ഉണ്ടാകുന്ന എല്ലാ സംശയത്തോടെയുമാണ് ഞങ്ങൾ അദ്ദേഹത്തെ അനുഗമിച്ചത്. അദ്ദേഹം ഇവിടത്തെ ക്ഷേത്രത്തിന്റെ ട്രസ്റ്റി ആണെന്നാണ് പറഞ്ഞത്. അദ്ദേഹമാണ് ക്ഷേത്രത്തെ പറ്റിയുള്ള കൂടുതൽ വിവരങ്ങൾ പങ്കുവെച്ചത്.

ശ്രീബുദ്ധന്റെ മൃതദേഹം സംസ്കരിക്കുന്നതിനുമുമ്പേ ഒരു പല്ല് ഒരു ബുദ്ധഭിക്ഷുവിനു ലഭിച്ചിരുന്നു. അദ്ദേഹം അത് ബ്രഹ്മദത്ത രാജാവിന് നൽകി. കുറേക്കാലം ഒഡിഷയിലെ പുരിയിൽ സൂക്ഷിച്ചശേഷം നാലാം നൂറ്റാണ്ടിൽ ബ്രഹ്മദത്ത രാജാവും പത്നി ഹേമമാലിയും ചേർന്ന് പല്ല് ശ്രീലങ്കയിൽ എത്തിച്ചു. പല രാജാക്കന്മാരാലും പരിചരിക്കപ്പെട്ട ശേഷം പല്ല് വീണ്ടും കാൻഡിയിൽ എത്തി.