കണ്ടാൽ കൊതിക്കും കർട്ടൻ

കർട്ടനിലെ ഏറ്റവും പുതിയ ട്രെൻഡ് അറിയാം. ഒപ്പം തിരഞ്ഞെടുക്കുമ്പോൾ ശ്രദ്ധിക്കേണ്ട കാര്യങ്ങളും

- സോന തമ്പി

രണ്ടു വർഷം മുൻപു വരെ ജനലുകളിൽ നിവർന്നു കിടന്നിരുന്ന നേർത്ത മറ പോലുള്ള ബ്ലൈൻഡ് ആയിരുന്നു ട്രെൻഡ്. ഇപ്പോൾ പക്ഷേ, ഞൊറിവുകളുടെ സൗന്ദര്യവുമായി വീണ്ടും കർട്ടനുകൾ തിരിച്ചു വരികയാണ്.

നമ്മുടെ കാലാവസ്ഥയ്ക്ക് അനുസരിച്ചു കോട്ടൻ, ലിനൻ എന്നിവയാണു കർട്ടന് ഏറ്റവും ഇണങ്ങുന്ന മെറ്റീരിയൽ വൻകിട ബ്രാൻഡുകളുടേതുൾപ്പെടെ സിന്തറ്റിക് തുണിത്തരങ്ങളും വിപണിയിൽ കൂടുതലായി എത്തുന്നുണ്ട്.

ചെലവു കുറയ്ക്കുന്നതിന്റെ ഭാഗമായി ഡ്രസ്സ് മെറ്റീരിയലും ചാക്കുതുണിയും വരെ ഡിസൈനർ കർട്ടൻ ആയി ഉപയോഗിക്കുന്നവരുടെ എണ്ണവും കൂടിവരുന്നു.

മുകളിൽ പിടിപ്പിക്കുന്ന കോവി'നകത്തു (cove) നിന്ന് ഭിത്തി മുഴുവൻ നിറയുന്ന കർട്ടനുകളാണ് മുറിയുടെ മിഴിവ്. വീടിന്റെ പൊതു ഇടങ്ങളിൽ മിതമായി വെളിച്ചം കടത്തിവിടുന്ന ഷിയർ (sheer) തുണിത്തരങ്ങൾ സ്വകാര്യതയും അതേസമയം പുറത്തേക്കുള്ള കാഴ്ചയും നൽകും.

വെള്ള, ഓഫ് വൈറ്റ്, ഇളം , ആഷ് തുടങ്ങിയ നിറങ്ങളാണു ഷിയർ മെറ്റീരിയലിന് സാധാരണയായി ഉപയോഗിക്കുന്നത്. ഇളം നിറങ്ങൾ മധ്യത്തിൽ കൊടുത്ത് കടും നിറങ്ങൾ വശങ്ങളിലേക്ക് ഇടുന്നതാണ് പതിവ്.