അടുക്കത്തെ ആമയൂട്ട്

കൂർമാവതാരം ഉപദേവതയായ അടുക്കത്ത് ഭഗവതി ക്ഷേത്രത്തിലെ വിശേഷ വഴിപാടാണ് ആമയൂട്ട്. ചർമരോഗശമന പ്രാർഥനയുമായാണു ഭക്തർ ആമയൂട്ടിനെത്തുന്നത്

- വി.ആർ.ജ്യോതിഷ്

കാ സർകോട്- കാഞ്ഞങ്ങാട് ഹൈവേയിൽ പൊയിനാച്ചി ജംക്ഷനിൽ നിന്നു കിഴക്കോട്ടു പോകുന്ന ബന്തടുക്ക റോഡിൽ വേലക്കുന്ന് ബസ് സ്റ്റോപ്പ്. അവിടെ ബസ് കാത്തുനിൽക്കുകയാണു ഒരു മുത്തശ്ശിയും രണ്ടു പേരക്കുട്ടികളും.

അടുക്കത്ത് ഭഗവതിക്ഷേത്രത്തിലേക്കുള്ള വഴി ചോദിച്ചപ്പോൾ കൂട്ടത്തിലുള്ള കൊച്ചുമിടുക്കി പറഞ്ഞു. “ഞങ്ങളും അടുക്കത്തേക്കാണ്. മന്നൂർ ഗവൺമെന്റ് ജൂനിയർ ബേസിക് സ്കൂളിൽ ര ണ്ടാം ക്ലാസിലും നാലാം ക്ലാസിലും പഠിക്കുന്ന കുട്ടികളാണ് അവർ. അശ്വതിയും ആദർശും. അശ്വതി മലയാളം മീഡിയം. ആദർശ് കന്നട മീഡിയം. കൂടെയുള്ളതു മുതു മുത്തശ്ശി കാർത്ത്യായനി. മുത്തശ്ശി രാഗിണിക്ക് അടുക്കത്ത അമ്പലത്തിൽ കഴകമാണ്. രാഗിണിയെ കാണാനുള്ള യാത്രയിലാണു മൂവരും.

"മഹിഷാസുരമർദിനിയാണ് ഇവിടുത്തെ ഉഗ്രപ്രതിഷ്ഠ ശംഖ്, ചക്രം, വില്ല്, അമ്പ് എന്നീ ദിവ്യായുധങ്ങൾ ധരിച്ച കിരീടമണിഞ്ഞ് മഹിഷാസുരന്റെ തലയിൽ ചവിട്ടി നിക്കുന്ന ദുർഗയാണു ബിംബം. ദേവാസുരയുദ്ധത്തിൽ ഇന്ദ്രനെ പരാജയപ്പെടുത്തിയ മഹിഷാസുരനെ മഹാവിഷ്ണു ആദിപരാശക്തിയായ സ്ത്രീരൂപമായി അവതരിച്ച് ഒൻപതു ദിവസം യുദ്ധം ചെയ്തു വധിച്ചെന്നാണ് ഐതിഹ്യം. വേലക്കുന്നിൽ നിന്നുള്ള മൂന്നു കിലോമീറ്റർ യാത്രയ്ക്കിടയിൽ കാർത്ത്യായനിയമ്മ അടുക്കത്ത് ക്ഷേത്രത്തെക്കുറിച്ചുള്ള ഐതിഹ്യം പറഞ്ഞു തന്നു.

മോലോത്തുംകാവിലാണ് അടുക്കത്ത് ഭഗവതിയുടെ വാസം. പേരു സൂചിപ്പിക്കുന്നതു പോലെ തന്നെ വിശാലമായ കാവിന്റെ നടുവിലാണു ക്ഷേത്രം. ശ്രീകോവിലിന് ഉൾപ്പടെ ചെങ്കല്ലിൽ തീർത്ത ചുമരുകൾ. കരിങ്കല്ലിൽ പണിത കട്ടിളകൾ. കിഴക്കേ ക്ഷേത്രകവാടത്തിൽ നമ്മളെ സ്വാഗതം ചെയ്യുന്നത് ഇരുനില ഗോപുരം. ഇവിടെ ദ്വാരപാലക പ്രതിഷ്ഠയില്ല. ദേവി ഉഗ്രമൂർത്തി ഭാവത്തിലായതുകൊണ്ടാണിത്. ആയിരത്തിലധികം വർഷങ്ങളുടെ പഴക്കം കൽപ്പിക്കുന്നുണ്ട് ക്ഷേത്രത്തിന്. ചിറക്കൽ കോലത്തിരി രാജാക്കന്മാരുടെ ഭരണകാലത്ത് ഈ പ്രദേശം കവയനാട് സ്വരൂപം എന്ന് അറിയപ്പെട്ടിരുന്നു എന്നും ഇവിടുത്തെ ക്ഷേത്രങ്ങൾ കവയനാട്ടായിരോൻ എന്ന സ്ഥാനപ്പേരോടു കൂടിയ സാമന്തന്മാരുടെ ഉടമസ്ഥതയിലായിരു ന്നു എന്നുമാണു ചരിത്രം.