പ്രശാന്തസുന്ദരം ഈ അകത്തളം

ആർഭാടമല്ല, ലാളിത്വവും വിശാലമായ ഇടങ്ങളുമാണ് അഭിനേത്രി മഞ്ജു പിള്ളയുടെ ഫ്ലാറ്റിന്റെ ആകർഷണം

- ശ്രീദേവി

ഗ്ലാമറിന്റെ വെള്ളിത്തിളക്കത്തിലേ ഇവരെ നമ്മൾ കാണാറുള്ളൂ. അതുകൊണ്ടാണല്ലോ സിനിമാ അഭിനേതാക്കൾ താരങ്ങൾ ആകുന്നത്. എന്നാൽ ക്യാമറയ്ക്കു മുന്നിൽ തിളങ്ങാൻ മഞ്ഞും മഴയും വെയിലും മണ്ണും പൊടിയുമെല്ലാം സഹിക്കേണ്ടിവരും. സെറ്റിൽ നിന്ന് സെറ്റിലേക്കും ഹോട്ടൽ മുറികളിലേക്കുമുള്ള പാച്ചിലിനൊടുവിൽ ആശ്വാസം കണ്ടെത്താനാണ് വീട്ടിലെത്തുന്നത്.

"വെറും നാല് ചുവരുകളല്ല, പകരം ശാന്തമായിട്ട് ഉറങ്ങാൻ പറ്റുന്ന ഇടമാകണം വീട് ' പ്രിയ അഭിനേത്രി മഞ്ജു പിള്ള പറയുന്നു. മഞ്ജുവിന്റെ തിരുവനന്തപുരം കഴക്കൂട്ടത്തെ ഫ്ലാറ്റ് ലളിതമാണ്, അതേസമയം എത്തിച്ചേരാൻ ഉൾപ്പെടെയുള്ള എല്ലാ സൗകര്യങ്ങളും ഉണ്ടുതാനും. കോണ്ടൂർ സൈബർ ഗാർഡൻസിൽ അഞ്ചാം നിലയിലെ ഏകദേശം 1900 ചതുരശ്രയടിയുള്ള ഫ്ലാറ്റാണ് മഞ്ജു സ്വന്തമാക്കിയത്.

ലിവിങ് ഏരിയയുടെ ഭാഗമായ, സ്ലൈഡിങ് വാതിൽ കൊണ്ട് വേർതിരിക്കാവുന്ന ബാൽക്കണി സ്പേസ് ആണ് അകത്തളത്തിന്റെ പ്രധാന ആകർഷണം. പ്രധാന വാതിൽ തുറന്ന് അകത്തേക്ക് ആദ്യമായി കയറിയപ്പോൾ കണ്ട ഈ ബാൽക്കണിയാണ് ഫ്ലാറ്റ് സ്വന്തമാക്കാൻ തന്നെ പ്രേരിപ്പിച്ചത് എന്ന് മഞ്ജു പറയുന്നു. “ ബാൽക്കണി എങ്ങനെ വ്യത്യസ്തമാക്കാം എന്നതായിരുന്നു പ്രധാന ചിന്ത. വ്യത്യസ്തമായ ക്ലാഡിങ്ങിനു വേണ്ടി തിരഞ്ഞെത്തിയത് ടൈൽ കൊണ്ടുള്ള ഈ ബുദ്ധനിലാണ്, ''മഞ്ജു പറയുന്നു. മനഃപൂർവം തേടിച്ചെന്നതല്ലെങ്കിലും ബുദ്ധമയമാണ് മഞ്ജുവിന്റെ ഫ്ലാറ്റിന്റെ ഇന്റീരിയർ. ക്യൂരിയോസിലും വോൾ ഹാങ്ങിങ്ങുകളിലുമെല്ലാം ബുദ്ധൻ തന്നെ. ഇതിൽ മിക്കതും സമ്മാനമായി ലഭിച്ചതാണ്.

യാത്രയിൽ കൂടെക്കൂടിയവർ