വായനയുടെ വൈദ്യം എഴുത്തിന്റെ ചികിത്സ

വഴിവിളക്കുകൾ

- പി. കെ. രാജശേഖരൻ

വഴിയിൽ മാത്രമല്ല വീട്ടിലും വലുതായി വിളക്കുകളില്ലാതിരുന്ന കാലത്താണ് ഞാൻ വായിച്ചു തുടങ്ങിയത്. കഴിഞ്ഞ നൂറ്റാണ്ടിലെ എഴുപതുകളുടെ കാര്യമാണു പറഞ്ഞുവരുന്നത്. പഞ്ഞത്തിനു മാത്രം പഞ്ഞമില്ലായിരുന്ന കാലം. ഉണ്ടായിരുന്നത് കുറച്ചു പുസ്തകങ്ങളും വായിക്കാൻ തോന്നാത്ത കുറച്ചു താളിയോലകളും. മഹാ പുരാണം ഭവനം മദീയം, നോക്കുന്നവർക്കൊക്കെ വിരക്തിയുണ്ടാമെന്ന് രാമപുരത്തു വാരിയർ പറഞ്ഞതു പോലെയായിരുന്നു സ്ഥിതി. അങ്ങനെ പുസ്തകങ്ങൾ വിളക്കുകൾ മാത്രമല്ല അന്നവുമായി. ജീവിതത്തിലെ ആദ്യത്തെ വഴിവിളക്കു കണ്ടത് ആ കുട്ടിക്കാലത്ത് അച്ഛൻ എന്നെ കൊണ്ടു ചെന്നെത്തിച്ച മലയിൻകീഴ് ശ്രീകൃഷ്ണവിലാസം ഗ്രന്ഥശാലയുടെ രൂപത്തിലാണ്.