ചങ്കു പിളർക്കും ഓൾട്ടറേഷൻ

എന്റെ വണ്ടി, എന്റെ സൈലൻസർ, ഞാൻ ഊരിവച്ചാൽ നിങ്ങൾക്ക് എന്താ? റോഡിലെ വാഹന പരിശോധനയിൽ കേൾക്കുന്ന സ്ഥിരം കമന്റ് ആണ്.

- കെ. ജി. ദിലീപ് കുമാർ

ഇതിനുള്ള ഏറ്റവും നല്ല മറുപടി, ഹിന്ദി സിനിമാനടൻ അക്ഷയ്കുമാറിന്റെ റോഡുസുരക്ഷയെ സംബന്ധിച്ച പരസ്യത്തിലെ വാചകമാണ്: 'Sadak kisi ke baap ki nahi hai'

(റോഡ് ആരുടെയും അച്ഛന്റെ വകയല്ല)

തെരുവീഥികളെ പ്രകമ്പനം കൊള്ളിക്കുന്ന രീതിയിൽ സൈലൻസർ മാറ്റിവച്ചും എക്സോസ്റ്റ് ബൈപാസ് ചെയ്തും വാഹനത്തിന്റെ സുരക്ഷാ മാനദണ്ഡങ്ങളിൽ മാറ്റംവരുത്തുകയും ചെയ്യുന്നവർ...

എതിരേ വരുന്ന ഡ്രൈവറെ അന്ധനാക്കുന്ന ലൈറ്റ് ഘടിപ്പിച്ചും പിറകിൽ വരുന്നവന്റെ മുഖത്തേക്കു ചെളി സ്പ്രേ ചെയ്യുന്ന തള്ളിനിൽക്കുന്ന ടയർ ഘടിപ്പിച്ചും മറ്റുള്ളവരിൽ നിന്നു വ്യത്യസ്തനാകാൻ ശ്രമിക്കുന്നവർ...

സംസ്കാരശൂന്യമായ പ്രവൃത്തിയുമായി മറ്റുള്ളവരുടെ സ്വകാര്യതയിലേക്കു കടന്നുകയറുന്നവർ, അവർ അറിയാതെ പോകുന്ന ചിലതുണ്ട്.

കോവിഡ് വരുന്നതിനു മുൻപുതന്നെ അന്തരീക്ഷ മലിനീകരണം കാരണം പകൽ പോലും മാസ്ക് ധരിച്ചു പുറത്തിറങ്ങേണ്ട സ്ഥിതി ഡൽഹിയിൽ സംജാതമായിരുന്നു.

മെഡിക്കൽ എമർജൻസി പ്രഖ്യാപിച്ച് സ്കൂളുകൾ അടച്ചിടുന്നു. കാൻസർ അടക്കം ശ്വാസകോശരോഗങ്ങൾ ഉത്കണ്ഠപ്പെടുത്തുന്ന രീതിയിൽ വർധിക്കുന്നു.

30 വർഷം മുൻപ് നമ്മുടെ നാട്ടിൽ നിലനിന്നിരുന്ന ജൈവ ആവാസവ്യവസ്ഥയാണോ ഇന്ന്.

ലക്ഷക്കണക്കിനു വർഷങ്ങൾകൊണ്ടു രൂപപ്പെട്ട ജൈവവ്യവസ്ഥയെ നാം തകർത്തെറിഞ്ഞില്ലേ? ഡൽഹിയിൽ 10 വർഷത്തിൽ കൂടുതൽ പഴക്കമുള്ള 2000 CC യ്ക്കു മുകളിലുള്ള ഡീസൽ വാഹനങ്ങൾ നിരോധിച്ചപ്പോൾ അതിൽ ഭൂരിഭാഗവും എത്തിയത് കേരളത്തിലേക്കാണ്.

കാര്യങ്ങൾ ഇത് ഗുരുതര സ്ഥിതിയിലേക്കു മാറുന്നതു കൊണ്ടാണ് യൂറോ സ്റ്റാൻഡേർഡിന്റെ ചുവടുപിടിച്ച് 2010 മുതൽ ബിഎസ് 3ഉം 2017മുതൽ ബിഎസ് 4ഉം 2020 മുതൽ ബിഎസ് ലേക്കും വാഹന മാനദണ്ഡങ്ങൾ പുതുക്കിയത്.

ഈ ഓരോ മാറ്റത്തിലും ആയിരക്കണക്കിനു കോടി രൂപയാണ് വാഹന നിർമാതാക്കളും ഇന്ധന നിർമാതാക്കളും പുതിയ മാനദണ്ഡങ്ങൾ പാലിക്കാനായി ചെലവിടുന്നത്. ഫെഡറേഷൻ ഓഫ് ഓട്ടമൊബീൽ ഡീലേഴ്സ് അസോസിയേഷന്റെ (FADA) കണക്കനുസരിച്ച് 4,600 കോടി മൂല്യം വരുന്ന 8.35 ലക്ഷം ഇരുചക്ര വാഹനങ്ങളാണ് ബിഎസ് 4ൽനിന്ന് ബിഎസ് 6ലേക്കു മാറിയപ്പോൾ മാത്രം വിൽക്കാനാകാതെ പൊളിക്കേണ്ടി വന്നത്.

ബിഎസ് 6 നിലവാരത്തിലുള്ള ഇന്ധന നിർമാണത്തിലേക്കു മാറാൻ ഇന്ത്യയിലെ റിഫൈനറികൾ മാത്രം ചെലവിട്ടത് 35,000 കോടി രൂപയാണെന്നാണു കണക്ക്.