ട്രാക്കുകൾക്ക് തീപിടിപ്പിച്ച് ആതിര മുരളി

ഇന്ത്യൻ നാഷനൽ റാലി ചാംപ്യൻഷിപ്പിലെ റോബസ്റ്റ റാലിയിൽ മിന്നുന്ന നേട്ടം

- നോബിൾ എം. മാത്യു

കാപ്പിത്തോട്ടങ്ങൾക്കിടയിലൂടെയുള്ള വീതി കുറഞ്ഞ ചെമ്മൺപാതയിലൂടെ പൊടിപാറിച്ച് ചീറ്റിപ്പറക്കുന്ന കാറുകൾ, വളവുകളിൽ അസാധ്യ വേഗത്തിൽ ഡ്രിഫ്റ്റ് ചെയ്തു പോകുമ്പോൾ ഉയർന്നുകേൾക്കുന്ന ആർപ്പുവിളികൾ, തലകുത്തനെ മറിഞ്ഞിട്ടും അവിടെ നിന്നും കുതിച്ചുപായുന്ന കാറുകൾ... സോഷ്യൽ മീഡിയയിൽ ഈയടുത്തു വൈറലായ കൂർഗിൽ നടന്ന ഐഎൻആർസി റാലിയിലെ ആവേശക്കാഴ്ചകളാണിത്. റാലിപ്രേമികൾ ആവേശത്തോടെ കണ്ട ആ റീലുകളിലൊന്നിലെ ചീറിപ്പാഞ്ഞ കാറിന്റെ ഡ്രൈവിങ് സീറ്റിൽ ഒരു മലയാളി വനിതയുണ്ടായിരുന്നു. കോട്ടയം സ്വദേശി ആതിര മുരളി. നാവിഗേറ്റർ സീറ്റിൽ ചേർത്തല തണ്ണീർമുക്കം സ്വദേശി അരുൺ ചക്കാലയ്ക്കലും.

മോട്ടർ സ്പോർട്സ് പുരുഷന്മാരുടെ മേഖലയാണെന്നാണല്ലോ പൊതുവേയുള്ള വെപ്പ്. എന്നാൽ, പുരുഷന്മാർ മടിച്ചു നിൽക്കുന്ന റഫ് ട്രാക്കുകളിൽ പോളോ കാറുമായി ചീറിപ്പായുകയാണ് ആതിര. ഇന്ത്യൻ നാഷനൽ റാലി ചാംപ്യൻഷിപ്പിലെ റൗണ്ടുകളിലൊന്നായ കൂർഗ് റോബസ്റ്റ റാലിയിൽ ഓവറോൾ കാറ്റഗറിയിൽ അഞ്ചാം സ്ഥാനവും ലേഡീസ് കാറ്റഗറിയിലെ ജേതാവുമാണ് ഓട്ടമോട്ടീവ് ഇൻഫ്ലുവൻസറും കണ്ടന്റ് ക്രിയേറ്ററും കൊച്ചിയിൽ ടൂർസ് ആൻഡ് ട്രാവൽസ് മേഖലയിൽ യുവസംരംഭകയും കൂടിയായ ആതിര.

ബുള്ളറ്റ് മുതൽ ജെസിബി വരെ