രാത്രിഞ്ചരൻമാർ...

കാൽനടയാത്രക്കാരും പ്രഭാതനടത്തവും!

- ദിലീപ് കുമാർ കെ. ജി മോട്ടർ വെഹിക്കിൾസ് ഇൻസ്പെക്ടർ & ട്രെയിനിങ് കോഓർഡിനേറ്റർ ഡ്രൈവർ ട്രെയിനി ഇൻസ്റ്റിറ്റ്യൂട്ട് ഓഫ് ങ് ആൻഡ് റിസർച് എടപ്പാൾ

ഇരുട്ടിൽ കറുത്ത പൂച്ചയെ കണ്ടെത്തുന്നതുപോലെ ദുഷ്കരമാണ് രാത്രിയിൽ കാൽനടയാത്രക്കാർ ശ്രദ്ധയിൽപെടുന്നത്. വെളിച്ചമില്ലാത്ത റോഡുകളിൽ നിന്നും കുറ്റിക്കാടുകളിൽ നിന്നും പാർക്ക് ചെയ്ത വാഹനങ്ങളുടെ മറവിൽ നിന്നും ആളുകൾ പെട്ടെന്നു പ്രത്യക്ഷപ്പെടുന്ന സന്ദർഭങ്ങൾ ഒരിക്കലെങ്കിലും അനുഭവിക്കാത്ത ഡ്രൈവർമാർ വിരളമായിരിക്കും.

ഭാരതത്തിൽ 2023ൽ മാത്രം 35,221 കാൽനട യാത്രക്കാരാണ് കൊല്ലപ്പെട്ടത്. ആകെ കൊല്ലപ്പെട്ടതിന്റെ 20.3% ആളുകളും കാൽനടക്കാരാണ്. ഇരുചക്ര യാത്രക്കാർ കഴിഞ്ഞാൽ മരണത്തിന്റെ കണക്കിൽ രണ്ടാം സ്ഥാനത്തു നിൽക്കുന്നതും കാൽനടക്കാർ തന്നെ.

അപകടസാധ്യത

നമ്മുടെ പല റോഡ് നിർമാണത്തിലും കാൽനടയാത്രക്കാരെ തീരെ പരിഗണിക്കു ന്നില്ല. ഭൂരിഭാഗം റോഡുകളിലും വാഹനം ഓടിക്കാൻ അനുവദിച്ചിട്ടുള്ള ക്യാരേജ് വേ കഴിഞ്ഞാൽ കാൽനടയാത്രക്കാർക്ക് സ്ഥലംതന്നെ മാറ്റി വച്ചിട്ടുണ്ടാവില്ല. അഥവാ ഉണ്ടെങ്കിൽത്തന്നെ അതു കാടുപിടിച്ച് ഉപയോഗശൂന്യമായിരിക്കും.

കാൽനടയാത്രക്കാർക്ക് സുരക്ഷിതമായി നടക്കുന്നതിനുള്ള ഹാർഡ് ഷോൾഡറോ ഫുട്പാത്തുകളോ ഇപ്പോഴും പല റോഡുകളിലും സ്വപ്നം മാത്രമാണ്, സ്വാഭാവികമായും റോഡപകടങ്ങളിൽ പെടുന്നവരും വർധിക്കുന്നു.

പരിമിതമായ ഫുട്പാത്തുകളും, വളവു തിരിവുകൾ ഉള്ളതും വെളിച്ചം കുറഞ്ഞതുമായ റോഡുകളും നമ്മുടെ അജ്ഞതയും പലപ്പോഴും അപകടങ്ങൾ സൃഷ്ടിക്കുന്നു.

രാത്രിയിൽ കാൽനടയാത്രക്കാരനെ താരതമ്യേന വളരെ മുൻകൂട്ടി കണ്ടാൽ മാത്രമേ ഒരു ഡ്രൈവർക്ക് അപകടം ഒഴിവാക്കാൻ കഴിയൂ.

പ്രഭാതസവാരി അപകടത്തിലേക്കോ?

പ്രഭാതസവാരിക്ക് ഇറങ്ങിയവരെ വാഹനം ഇടിക്കുന്ന ഒട്ടേറെ സംഭവങ്ങളാണ് സമീപ കാലത്ത് റിപ്പോർട്ട് ചെയ്യപ്പെട്ടിരിക്കുന്നത്.