ഹൈ ഒക്റ്റെയ്ൻ

സോഷ്യൽമീഡിയയിൽ ഏഴര ലക്ഷം ഫോളോവേഴ്സുള്ള "ഒക്റ്റെയ്ൻ ഗേൾ' മിയയുടെ വാഹനവിശേഷങ്ങൾ

- അശ്വതി പങ്കജ്

വാഹനപ്രേമികളുടെ ഇടയിലെ താരമാണ് തൃശൂർക്കാരി മിയ ജോസഫ്. പ്രത്യേകിച്ച് ന്യൂ ജനറേഷൻ ചെറുപ്പക്കാരുടെ ഇടയിൽ. 21 വയസ്സേ ഉള്ളു എങ്കിലും പോളോ ജിടി മുതൽ പോർഷെ വരെയാണ് മിയയുടെ കാർ കലക്ഷനിലുള്ളത്. സംശയമുണ്ടെങ്കിൽ ഒക്റ്റെയ്ൻ ഗേൾ എന്ന് സേർച് ചെയ്തു നോക്കിയാൽ കൃത്യമായി മനസ്സിലാകും. 21 വയസ്സുള്ള പെൺകുട്ടിക്കെങ്ങനെ ഇത്രയധികം വാഹന കലക്ഷൻ? അക്കാര്യം മിയതന്നെ പറയും...

"അച്ഛനും അമ്മയും കടുത്ത വാഹന പ്രേമികളാണ്. അപ്പോൾ ആ വാഹനപ്രേമം എനിക്കു കിട്ടിയില്ലെങ്കിലല്ലേ അത്ഭുതമുള്ളൂ. കോവിഡ് സമയത്ത് വീട്ടിലുള്ള വാഹനങ്ങളെപ്പറ്റി വെറുതെ ഇട്ട പോസ്റ്റിനും വിഡിയോയ്ക്കും നല്ല സ്വീകാര്യത ലഭിച്ചു. അവിടെനിന്നു തുടങ്ങിയ യാത്രയാണിത്. ഓട്ടമൊബീൽ രംഗത്തേക്ക് പെൺകുട്ടികളെ കൊണ്ടുവരിക എന്ന ലക്ഷ്യം കൂടി എനിക്കുണ്ട്.' മിയ പറയുന്നു.

അപ്രതീക്ഷിതമായി ലഭിച്ച ഗോൾഫ് ജിടിഐ

ഇരുപത്തിയൊന്നാം പിറന്നാൾ ദിനത്തിൽ അച്ഛന്റെ സമ്മാനമായി ഫോക്സ്വാഗൻ ഗോൾഫ് ജിടിഐ ലഭിച്ചത് ഇപ്പോഴും വിശ്വസിക്കാൻ കഴിയുന്നില്ലെന്നാണ് മിയ പറയുന്നത്. "വാഹനത്തിന്റെ അൺവീലിങ് എന്നു പറഞ്ഞാണ് ഷോറൂമിലേക്ക് എന്നെ വിളിച്ചുകൊണ്ടുപോയത്. അവിടെ ചെന്നപ്പോൾ ഒരിക്കലും പ്രതീക്ഷിക്കാത്ത ഒരു സർപ്രൈസ് ആയിരുന്നു അത്. ഗോൾഫ് ജിടിഐ കാണാൻ പോയ ഞാൻ പുത്തൻ കാറുമായി തിരിച്ചെത്തി. പോളോ ജിടിഐയിൽ നിന്ന് ഗോൾഫ് ജിടിഐയിലേക്കുള്ള പ്രമോഷൻ വിശ്വസിക്കാൻ കഴിഞ്ഞില്ല.

ഡ്രീം കാറിലെ ഫസ്റ്റ് ഡ്രൈവ്

“അയ്യോ... കൂടുതലെന്തു പറയാൻ, അടി പൊളിയാണ്. ഗോൾഫ് ജിടിഐ എനിക്കു പറ്റിയ ഒരു പെർഫെക്ട് കാറാണ്. നല്ല പവറും മികച്ച ഹാൻഡിങ്ങും. ഓടിക്കുമ്പോൾ നല്ല കോൺഫിഡൻസാണ് ലഭിക്കുന്നത്. അങ്ങനെ എല്ലാം വച്ചുനോക്കുമ്പോൾ ഇതാണ് എന്റെ പെർഫെക്ട് കാർ. ഓടിക്കാൻ അത്രയധികം ഇഷ്ടമുള്ള വണ്ടി ആയതുകൊണ്ടും കൂടിയാണ് ഇതെന്റെ ഡ്രീം കാറായത്.