സൂപ്പർ സിറോസ്

കോംപാക്ട് എസ്യുവി വിപണി പിടിച്ചടക്കാൻ കിയയിൽനിന്ന് പുതിയൊരു താരം- സിറോസ്

- നോബിൾ എം. മാത്യു

സോണറ്റിനും സെൽറ്റോസിനുമിടയിൽ പുതിയൊരു മോഡലിന്റെ ആവശ്യമുണ്ടായി രുന്നോ? കിയയുടെ പുതിയ കോംപാക്ട് എസ്യുവി സിറോസ് വിപണിയിലെത്തിയപ്പോൾ മിക്കവരും ചോദിച്ചതിതാണ്. മാത്രമല്ല, കാഴ്ചയിൽ വലുപ്പമുണ്ടോ? ഈ ഡിസൈൻ സ്വീകരിക്കപ്പെടുമോ? വിലയെങ്ങനെ? അകത്ത് ഇടമുണ്ടോ തുടങ്ങിയ ചോദ്യങ്ങൾ പിന്നാലെയും. ഇതിനെല്ലാമുള്ള ഉത്തരം തേടിയാണ് സിറോസിന്റെ പെട്രോൾ ഓട്ടമാറ്റിക് മോഡലിന്റെ ഡ്രൈവിങ് സീറ്റിലേക്കു കയറിയത്. നഗരവും ഹൈവേയും ചുരവും നാട്ടുപാതകളും കാട്ടുവഴികളും താണ്ടിയ ടെസ്റ്റ് ഡ്രൈവിലേക്ക്...

ഡിസൈൻ

സിറോസിന്റെ ഫോബ് കീയിൽ നിന്നുതന്നെ തുടങ്ങാം. വാഹനം അൺലോക്ക് ലോക്ക് ഫങ്ഷൻ മാത്രമല്ല, നാലു ഡോറിന്റെയും വിൻഡോ ഗ്ലാസ് ഉയർത്താനും താഴ്ത്താനും ഫോബ് കീയുപയോഗിച്ചു പറ്റും. മാത്രമല്ല ഇതുപയോഗിച്ച് എൻജിൻ സ്റ്റാർട് ചെയ്യാനും പറ്റും. സെഗ്മെന്റിൽ ആദ്യമായി സ്ട്രീം ലൈൻ ഡോർഹാൻഡിലുമായാണ് വരവ്. റേഞ്ച് റോവറിലൊക്കെ കണ്ട തരത്തിലുള്ളത്.

നാലുമീറ്ററിൽ താഴെയാണ് സിറോസിന്റെ നീളം. നീളം വീതി ഉയരം എന്നിവ യഥാക്രമം 3995 എംഎം 1800എംഎം 1665 എംഎം.വീൽബേസ് 2550 എംഎം. സോണ റ്റിനെക്കാളും 10എംഎം വീതിയും 55 എംഎം ഉയരവും 50 എംഎം വീൽബേസും കൂടുതലുണ്ട് സിറോസിന്. എന്നാൽ മാസ് ലുക്കല്ല മറിച്ച് കൗതുകം ജനിപ്പിക്കുന്ന കട്ടുകളും ക്രീസുകളുമാണ് കൂടുതലും.

രണ്ടു ദിവസത്തെ യാത്രയിൽ സിറോസിനെ കണ്ട മുഖങ്ങളിൽ നിന്നും വാഹനത്തെക്കുറിച്ചു താൽപര്യത്തോടെ സംസാരിച്ചവരിൽ നിന്നും ഒരു കാര്യം മനസ്സിലായി ഡിസൈനു സമ്മിശ്ര പ്രതികരണമാണ്. വാഗൺ ആറിനോട് സാമ്യപ്പെടുത്തി സംസാരിച്ചവരും ഒട്ടേറെ.

ഇവി9, ഇവി3 എന്നിവയുടെ ഗ്ലോബൽ ഡിസൈനുമായെത്തിയ സിറോസിനെ ചെറുപ്പക്കാർക്ക് കാര്യമായി പിടിച്ചിട്ടുണ്ട്. ചതുരവടിവുള്ള രൂപമെങ്കിലും കാഴ്ചയിൽ പുതുമ കൊണ്ടുവരാൻ ഡിസൈൻ ടീമിനു കഴിഞ്ഞിട്ടുണ്ട്.