New Heroes

140 കിമീ / 70 കീമി റേഞ്ചുള്ള രണ്ടു മോഡലുകളുമായി ഹീറോ ഇലക്ട്രിക്

- റോഷ്നി

ഇലക്ട്രിക് സ്കൂട്ടർ നിർമാണത്തിൽ 14 വർഷത്തെ പാരമ്പര്യം ഹീറോയ്ക്കുണ്ട്. അതു കൊണ്ടുതന്നെ സുപരിചിതമാണ്. ഹൈ സ്പീഡ് നിരയിൽ ഒപ്റ്റിമയുടെ പുതിയ രണ്ടു വേരിയന്റുകളുമായാണ് ഇത്തവണ ഹീറോ എത്തിയിരിക്കുന്നത്. 140 കിമീ റേഞ്ചുള്ള ഒപ്റ്റിമ സിഎക്സ് ഇആറും 70 കിമീ റേഞ്ചുള്ള ഒപ്റ്റിമ സിഎം. ലൈസൻസ് ആവശ്യമുള്ള ഹൈ സ്പീഡ് മോഡലുകളാണിവ.

ഒപ്റ്റിമ സിഎക്സ് ഇആർ

ഹീറോയുടെ ഇലക്ട്രിക് സ്കൂട്ടറുകളിൽ തലയെടുപ്പുള്ള മോഡലാണ് സിഎക്സ് ഇആർ. ദിവസേന കൂടുതൽ ദൂരം യാത്ര ചെയ്യേണ്ടി വരുന്നവർക്കു വേണ്ടി പ്രത്യേകം ഡിസൈൻ ചെയ്ത മോഡൽ. ഡ്യുവൽ ബാറ്ററി ഉള്ളതിനാൽ 130-140 കിലോമീറ്റർ സഞ്ചരിക്കാം. രണ്ടു ബാറ്ററികളും ഊരിമാറ്റാം. ഒരേ സമയം ചാർജ് ചെയ്യുന്നതിനായി രണ്ടു ചാർജറുകളും ഉണ്ട്. സ്കൂട്ടർ ഓൺ ആയിരിക്കുമ്പോൾ ഏതു ബാറ്ററിയാണോ ഉപയോഗിക്കുന്നത് അതിന്റെ ചാർജ് നില ഡിജിറ്റൽ കൺസോളിൽ കാണാം. ബി1, ബി2 എന്നിങ്ങനെയാണ് സീറ്റിനടിയിൽ ബാറ്ററി ക്രമീകരിച്ചിരിക്കുന്നത്.

ബി1 മുകളിലും ബി2 സ്റ്റോറേജിന് അടിയിലും. ഏതു ബാറ്ററിയാണോ ഉപയോഗിക്കേണ്ടത് അതു തിരഞ്ഞടുക്കുന്നതിനായി സീറ്റിനടിയിലെ സ്റ്റോറേജിനടുത്തായി കാണുന്ന ചെറിയ ബട്ടൺ (B1, B2) അമർത്തിയാൽ മതി. രണ്ടു ബാറ്ററി ഉള്ളതിനാൽ ഭാരം അൽപം കൂടുതലാണ്.