നാൽപതുകളിലെ രണ്ടാം കൗമാരം

കൗമാരത്തിൽ ആസ്വദിക്കാൻ പറ്റാതെ പോയ, മാറ്റിവയ്ക്കപ്പെട്ട സന്തോഷങ്ങൾ നാൽപതുകളിൽ തേടിപ്പോകാം

- 

മിഡ് ലൈഫ് ക്രൈസിസ് - നാല്പതുകളിലെത്തുമ്പോൾ കേൾക്കുന്ന വരിയാണിത്. നിറം മങ്ങിത്തുടങ്ങിയോ എന്നു സംശയിക്കുന്ന സമയം. ആ സംശയം ശരിക്കുമുള്ള സന്തോഷങ്ങളെ ഇല്ലാതാക്കുകയാണു ചെയ്യുന്നത്.

ഒന്നുറപ്പിക്കുക, നാൽപതുകൾ രണ്ടാം കൗമാരമാണ്. ഒരു പക്ഷേ, കൗമാരത്തിൽ ചെയ്യാനാകാതെ പോയ പലതും സ്വാതന്ത്ര്യത്തോടെ ചെയ്യാൻ കിട്ടുന്ന സുന്ദര കാലം. അതൊരു മോഹയാത്രയാകാം അല്ലെങ്കിൽ സൗഹൃദങ്ങളുടെ ഒത്തുചേരലാകാം.

ചില നെഗറ്റീവ് ചിന്തകൾ മനസ്സിലേക്കു കടന്നുവരാം. അവയെ തുടക്കത്തിൽ തന്നെ ഇല്ലാതാക്കുക. സമപ്രായ ക്കാരുടെ നേട്ടങ്ങൾ സ്വന്തം ജീവിതവുമായി താരതമ്യം ചെയ്യണ്ട. അവർക്ക് അത്തരം നേട്ടങ്ങൾ ഉണ്ടെങ്കിൽ അതുപോലുള്ള നേട്ടങ്ങൾ നമ്മുടെ ജീവിതത്തിലും ഉണ്ടായിട്ടുണ്ട് ആ സന്തോഷങ്ങൾ കണ്ടെത്താനാകണം എന്നു മാത്രം.

നാൽപതുകളിലെത്തുമ്പോൾ ശരീരത്തിലുണ്ടാകുന്ന മാറ്റങ്ങൾ അപകർഷതാ ബോധം ഉണ്ടാക്കിയേക്കാം. കണ്ണാടിയിൽ നോക്കി നെടുവീർപ്പിടുന്ന അവസ്ഥ ഉണ്ടാകരുത്. അത്തരം വിഷമങ്ങൾക്ക് ജീവിതത്തിൽ ഒരു പ്രസക്തിയുമില്ല. സങ്കടപ്പെട്ടിരിക്കാതെ വ്യായാമത്തിലൂടെ ഡയറ്റിലൂടെ ഊർജസ്വലത തിരിച്ചു പിടിക്കാൻ ശ്രമിക്കാം

ശരീരസൗന്ദര്യം മാത്രമല്ല സ്ത്രീയുടെ മൂല്യം നിശ്ചയി ക്കുന്നത്. ജീവിതത്തിലുണ്ടായ നേട്ടങ്ങൾ തിരിച്ചറിഞ്ഞ് എത്ര ഉയരെയാണു നിൽക്കുന്നതെന്നു തിരിച്ചറിയുക. സന്തോഷത്തിനു തടസ്സം വരുന്ന ഏതൊരു ചിന്തയെയും മായ്ച്ചു കളയാനുള്ള കരുത്തും തിരിച്ചറിവും അതിനുള്ള വഴികളുമാണു തിരയേണ്ടത്.