ChatGPT புத்திசாலி நண்பனா? கல்வி குறுக்கு வழியா?

தொழில்நுட்பம், விஞ்ஞானம் ஆகிய இரண்டும் தற்கால உலகின் இரு கண்கள். இந்நாளில் தொழில்நுட்பம் இன்றி எதுவும் சாத்தியம் இல்லை. காரணம் தொழில்நுட்ப வளர்ச்சியின் அபரிவிதமான வளர்ச்சி. இவற்றுள் தற்கால முக்கிய சக்தியாக வலம் வருவது செயற்கை நுண்ணறிவு (Artificial Intelligence). இவ் செயற்கை நுண்ணறிவானது முக்கியமான புரட்சியை உலகளாவிய ரீதியில் ஏற்படுத்தி உள்ளது. AI தொழில்நுட்பமானது மருத்துவம், கல்வி, வணிகம், சுகாதாரம், அரசியல் உட்பட பல துறைகளில் அதிரடியாக முன்னேறி வருகின்றது. அந்த வகையில் 21 ஆம் நூற்றாண்டின் கல்விச் சூழல் தொழில்நுட்ப வளர்ச்சியால் முழுமையாக மாறி வருகின்றது என்றால் மிகை ஆகாது. இதில் Open AI நிறுவனத்தின் ChatGPT போன்ற பெரிய மொழி மாதிரிகள் (Large language models), கல்வியில் புதிய முன்னேற்றங்களை ஏற்படுத்திக் கொண்டு வருகின்றன. இன்று பல்கலைக்கழக மாணவர்களின் கதாநாயகனாக ChatGPT மாறி உள்ளது என்றால் பிழையில்லை.

- முரளிதரன் ஷம்பவி, யாழ்ப்பாணம் பல்கலைக்கழகம்

பல்கலைக்கழக மாணவர்கள் குறிப்பாக இதனை பயன்படுத்தி தகவல் தேடல், கட்டுரை எழுதுதல், நிரலாக்கு உதவி, கோட்பாடுகளின் விளக்கம், மொழிபெயர்ப்பு, தேர்வு தயாரிப்பு, வினாக்களுக்கு விடைகளைப் பெற்றுக் கொள்ளுதல் என பன்முகத்திலான தேவைகளைப் பூர்த்தி செய்து கொள்கின்றனர். ChatGPT ஓர் சக்தி வாய்ந்த உதிரி கருவி (Supportive tool) மட்டுமே. அது மாணவர்களின் அறிவு பயணத்திற்கு துணை தரும் ஓர் சிந்தனை உடனான கருவியாக இருக்கும். அதே வேளை எதிர்மறையான பக்கங்களையும் தன்னகத்தே கொண்டுள்ளது.

ChatGPT உதிர் கருவியின் சாதக விடயங்களை உள்ளடக்கிய பக்கங்களைப் புரட்டிப் பார்த்தோமானால் அதன் முக்கிய நன்மைகளாக பின்வரும் விடயங்கள் அமைகின்றன.

1. அறிவு பெற விரைவான வழி மற்றும் நேர வழிகாட்டி

மாணவர்கள் நேரம் குறைவாக இருக்கும்போது ஒரு தலைப்பினையோ அல்லது ஒரு கட்டுரையோ சுருக்கமாகப் புரிந்து கொள்ள வேண்டுமானால் ChatGPT ஒரு விரைவான எளிதான வழியைத் தரும். இதன் மூலம் மாணவர்கள் ஒரு விடயத்தை எளிமையாகப் புரிந்து கொள்ளவும், நேரத்தை மீதப்படுத்தவும் ஏதுவாக அமையும். இது ஒரு சாதாரண சம்பவம் அல்ல. ஒரு புதிய கல்வி யுத்தியின் அறிகுறி.

2. எழுத்துத் திறனுக்கு ஆதரவு.

மொழிப் பிழைகள், வாக்கிய அமைப்புகள், நடைமுறை எழுத்து முறைகள் போன்றன ChatGPT மூலம் மாற்றி சிறப்பிக்க முடிகிறது. குறிப்பாக ஆங்கிலத்தில் எழுதக் கடினப்படும் மாணவர்களுக்கு இது தன்னம்பிக்கையை அளிக்கின்றது.

3. ஆய்வுப் பணிகளுக்கான வழிகாட்டி.

ChatGPT ஆனது கட்டுரை வடிவமைப்பில் தலைப்பு கூறுகள் அமைத்தல், உள்ளடக்கத்திற்கான முன்னோட்டங்களுக்கான விளக்கங்களைத் தருதல், Assignment செய்தல் போன்றவற்றிற்கு உதவுவதால் ஆரம்பத்தில் ஒரு குறிப்பிட்ட ஆய்வு விடயம் பற்றித் தெரியாமல் தடுமாறும் மாணவர்களுக்கான சிறப்பான வழிகாட்டியாக அமைகின்றது. இது பின்னாளில் மாணவர்களின் திறமையை மேம்படுத்துவதற்கும் அடித்தளமாக அமைகிறது.