21-ஆம் நூற்றாண்டு இந்தியாவுக்கானது

தற்போதைய 21-ஆம் நூற்றாண்டு, 140 கோடி இந்தியா்களுக்குச் சொந்தமானது; சுதந்திர நூற்றாண்டைக் கொண்டாடும் 2047-ஆம் ஆண்டுக்குள் இந்தியா வளா்ந்த நாடாக உருவெடுக்கும் என்று பிரதமா் நரேந்திர மோடி நம்பிக்கை தெரிவித்தாா்.

- 

ஆந்திர மாநிலம், கா்னூலில் வியாழக்கிழமை நடைபெற்ற நிகழ்ச்சியில் மொத்தம் ரூ.13,000 கோடிக்கும் அதிக மதிப்பில் பணி நிறைவடைந்த வளா்ச்சித் திட்டங்களைத் தொடங்கிவைத்த பிரதமா் மோடி, புதிய திட்டங்களுக்கும் அடிக்கல் நாட்டினாா்.

சாலைப் போக்குவரத்து, ரயில்வே, தொழில் துறை, மின் தொடரமைப்பு, பாதுகாப்பு உற்பத்தி, பெட்ரோலியம்-இயற்கை எரிவாயு தொடா்பான திட்டங்கள் அடங்கும்.

இந்நிகழ்ச்சியில் பிரதமா் மோடி பேசியதாவது: பஹல்காம் பயங்கரவாதத் தாக்குதலுக்குப் பதிலடியாக, பாகிஸ்தானில் உள்ள பயங்கரவாத உள்கட்டமைப்புகள் ‘ஆபரேஷன் சிந்தூா்’ ராணுவ நடவடிக்கை மூலம் அழிக்கப்பட்டன. இந்த நடவடிக்கையின்போது, உள்நாட்டுத் தளவாடங்களின் வல்லமை நிரூபணமானது.

உள்நாட்டில் உற்பத்தியை அதிகரிக்க உகந்த சூழல் உருவாக்கப்பட்டுள்ளது. உலகின் உற்பத்தி மையமாக இந்தியா பாா்க்கப்படுகிறது. ‘தற்சாா்பு இந்தியா’ தொலைநோக்குப் பாா்வையே இந்த வெற்றிக்கு காரணம்.