સંઘર્ષ અને સફળતા સુધીની સ્વાદિષ્ટ સફર

એક સમય હતો જ્યારે એ પોતાના પરિવાર માટે જ રસોઈ બનાવતાં. બાળકોને શું ભાવે છે, પતિને શું ગમશે એ પ્રમાણે જ રસોડામાં એમનું કામ શરૂ થાય. જો કે જીવનના સાડા સાત દાયકા પછી, કોવિડ સમયે એમણે અથાણાં, નાસ્તા અને ગુજરાતી થાળીના ઑર્ડર લેવાનું શરૂ કર્યું અને પછી તો ટીવી શો ‘માસ્ટર શેફ’માં ભાગ લઈ એ બધાનાં લાડીલાં બની ગયાં.

- હેતલ રાવ

પરંપરા, જવાબદારી અને કપરા સંજોગોને માત આપીને એમણે પોતાના માટે એક નવો માર્ગ શોધ્યો. વાત છે ઊર્મિલાબહેન આશરની, જે આજે ઊર્મિલાબા તરીકે જાણીતાં છે. રસોઈકળામાં નિપુણ આ ૮૦ વર્ષી સન્નારીની જિંદગીની સફર અદ્ભુત છે. આખું જીવન એમણે રસોઈને સમર્પિત કર્યું અને આજે એમનું નામ એમની રસોઈને કારણે જ જાણીતું બન્યું છે. બોલીવૂડના અનેક કલાકારો તથા અન્ય લોકપ્રિય હસ્તીઓએ એમના સાથે સેલ્ફી લીધી છે. એમની યુટ્યૂબ ચૅનલ ગુજ્જુબેનના નાસ્તા ખૂબ જ લોકપ્રિય છે.

આજે તો એ સફળતાના શિખરે છે, પરંતુ એમની સફર આસાન નહોતી. લગ્ન પછી એમનું સમગ્ર જીવન કુટુંબ માટે સમર્પિત રહ્યું. ત્રણ સંતાનો અને પતિ સાથે એક સરળ જીવન પસાર કરી રહ્યાં હતાં, પરંતુ એક પછી એક પડકાર ઊભા થતા ગયા. પતિનું અવસાન થયું અને સમયની સાથે એમનાં સંતાન પણ આ દુનિયાને અલવિદા કહી ગયાં. આમ છતાં ઊર્મિલાબા અડગ રહ્યાં. પરિસ્થિતિએ એમને તોડી નાખવાને બદલે, વધુ મજબૂત બનાવ્યાં. એમણે પોતાના પરિવારની સંપૂર્ણ જવાબદારી સ્વીકારીને એમના માટે એક નવી જિંદગી સર્જી. અસ્તિત્વના પ્રશ્ન વચ્ચે પણ એમણે રસોઈને જ પોતાનું ધ્યેય બનાવી દીધું.

એક સાવ સામાન્ય મહિલાથી પ્રખ્યાત માસ્ટર શેફ સુધીની એમની સફર પ્રેરણાદાયક છે. ઊર્મિલાબહેને એ સાબિત કર્યું કે ઉંમર માત્ર એક આંક છે અને જો મનમાં હિંમત અને લાગણી હોય તો જીવનની કોઈ પણ મુશ્કેલી તમને રોકી શકતી નથી.

મૂળ ગુજરાતના કચ્છનાં અને મુંબઈમાં રહેતાં દમયંતી અને કરસનદાસ કાપડિયાનાં છ સંતાનમાં ઊર્મિલા પાંચમા. બાળપણથી જ એમને નવું શીખવાની તલપ. એમણે સાત ચોપડી સુધી અભ્યાસ કર્યો, જે એ સમયે એક મહત્ત્વપૂર્ણ સિદ્ધિ ગણાતી. માત્ર ૧૭ વર્ષની ઉંમરે મુંબઈમાં જ રહેતા જમનાદાસ આશર સાથે એમનાં લગ્ન થયાં.