પલક

લઈ ચોટલા બે ને કાળી રિબિને ફરી વાળ બાંધીને યાદો નીકળશે જવા સ્કૂલ સાથે સવારે હું આજે તને બૂમ પાડું સખી રે! હવે ક્યાં? ફરી વાળ બાંધીને યાદો નીકળશે...

- હિતેન આનંદપરા

ટેક્નોલૉજીને કારણે જે ઉત્તમ કામ થઈ રહ્યાં છે એમાંનું એક કામ જૂના મિત્રોને ખોળવાનું અને એમનો સંપર્ક સ્થાપિત થવાનું ગણી શકાય. એકવીસમી સદીમાં વીસમી સદીના અતીતનો એટલે કે રિ-યુનિયનનો મહિમા વધતો જાય છે. શાળાના મિત્રો ફરી પાછા ત્રણ-ચાર દાયકે મળે એટલે મસ્તીની મૅરેથોન શરૂ થાય. તોફાનોનું રિ-રન થાય. હાસ્યાસ્પદ ભૂલોને યાદ કરી હસી કાઢવાનો અવસર મળે.

વીતેલાં વરસોના આસવનો એક આગવો ટેસ્ટ હોય છે. બાળપણમાં કેળવાયેલો નાતો સ્વાર્થથી જોજનો દૂર હોય એટલે એનું મહત્ત્વ વધી જાય. સમયને પણ તટસ્થ ભાવે ઊભા રહીને આ સંબંધને નીરખવામાં મજા પડતી હશે.