નારાયણ..નારાયણ હરિઈચ્છા

લગ્ન મંડપમાં વર-કન્યાની આવી તે કેવી ‘અદલાબદલી’?

- 

નારાયણ... નારાયણ.' નરેશકાકાની એન્ટ્રી થતાં બધાને ખબર પડી જાય કે નારદ નામે જાણીતા નરેશકાકા આવ્યા. લે, એમને ન ઓળખ્યા? મુકેશભાઈના દૂરના પિતરાઈ ભાઈ. એમના મુખમાં સદાય નારાયણ વસતા એટલે કે વાતે વાતે એમને નારાયણ... નારાયણ બોલવાની આદત. કંઈ જાણે કે ન જાણે, પણ એમને અહીંની વાત ત્યાં અને ત્યાંની વાત અહીં કરવાની કુટેવ પણ ખરી.

‘નારાયણ... નારાયણ! મારા કિશોરનાં ચોવીસમીએ મૅરેજ છે. તમે તો જાણો છો, ચોવીસ વરસ પહેલાં એની રાતી રાયણ જેવી મા કિશોરને જનમ આપતાંવેંત ભગવાનને ઘેર પહોંચી ગઈ. અમારો બાબલો જન્મતાંવેંત એવા વિચિત્ર રાગે રડ્યો જાણે યુડલી ઉડલી ઊઊ... એમ યોર્ડલિંગ કરતો હોય એટલે એનું નામ પાડ્યું કિશોર. મને બધાએ બહુ સમજાવ્યો કે ફરી પરણી જા, પણ ના. એવું તો કિશોરો કરે.' નરેશભાઈએ ડસ્... ડચુ કરી ડચકારા બોલાવ્યા, માથું હલાવ્યું અને આગળ ચલાવ્યું:

‘કિશોરને ખાતર મેં બીજાં લગન કિશોરને એકલા હાથે ઉછેરીને મોટો કર્યો. હવે એની વહુ આવીને ઘરને અને એને સાચવી લે એટલે હું છૂટો. જુઓને, બધા વહેવારેય મારે જ સાચવવાના એટલે હું કંકોતરીઓ વહેંચવા નીકળ્યો છું. આપ સૌ સહકુટુંબ પધારજો. ચંદુ ચીકણાને ત્યાં કંકોતરી આપીને આવ્યો. ઈ વર-બેરી કો’ક બાબતે એવાં બાખડતાં'તાં તે મને દેખીને ચૂપ થઈ ગયાં. આપણે શી પંચાત? મને તો લાગે છે કે બેય છૂટાછેડા લઈ લેશે.’

‘એમ? પણ તમે બેસો તો ખરા.

નરેશભાઈ, ચા-નાસ્તો કરીને જ જાવ.’ ગીતાબહેને વિવેક દાખવ્યો.

‘એ તો પંકજને ત્યાં પતાવીને આવ્યો. શું છે કે એની વાઈફ તેલ લેવા ગઈ હતી તે એના રામાએ હોંશભેર ચા અને સાથે ગરમાગરમ ભજિયાં ઉતારી દીધાં. કોઈ ટોકવાવાળું નહોતું ને. રામો આ પહેલાં રામભરોસે હિંદુ હોટેલમાં કામ કરતો'તો... એટલે આદતવશ હજી તો ખાવાનું પૂરું કરું એ પહેલાં ઈ રામુડો પ્લેટ પણ ઉપાડી ગ્યો. લો ત્યારે, હું નીકળું. નારાયણ... નારાયણ.’

‘મોઢું તો ગળ્યું કરવું જ પડે. આ પેંડો લ્યો.’

‘અરે ભાભી, સુરતી સાડીના વેપારી સુકેતુએ નવી ગાડી લીધી તે એણે પેંડો ખવડાવ્યો. મારે ડાયાબિટીસ છે, પણ તમે કહો છો તો એકાદો ખાઈ લઉં છું. બાકી તમે કહો, અમિત મજામાં ને? શું કામકાજ કરે છે?’