પચ્ચીસ વર્ષે ફેસબુકથી થયો ફેર મેળાપ.. હિના સંઘવી - સંગીતા દેસાઈ

સંગીતાએ હિનાને ફ્રેન્ડ રિક્વેસ્ટ અને મેસેજ મોકલ્યાં. જો કે હિનાબહેન ભાગ્યે જ ફેસબુક જુએ, પણ એનું મુહૂર્ત આવ્યું ત્યારે એના ફેસબુક પેજ પર નામ જોવા મળ્યુંઃ સંગીતા દેસાઈ. પચ્ચીસ વર્ષે ફરી બન્ને ફ્રેન્ડ્ઝનો મેળાપ થયો!

- 

દક્ષિણ મુંબઈના ઠાકુરદ્વાર વિસ્તારમાં રહે હિના મુનિ અને તાડવાડીમાં રહે સંગીતા શાહ. વર્ષ ૧૯૮૦માં બન્ને એસએનડીટી કૉલેજમાં અગિયાર અને બાર ધોરણ એક ક્લાસમાં ભણતાં. કારકિર્દીનાં લક્ષ્ય જુદાં, પણ વિચારો અને શોખ સમાન. બન્ને એકબીજાને ઘેર જાય. હિનાનાં મમ્મી શીલાબહેન સંગીતાને પ્રેમથી જમાડે. હિનાએ એના સાહિત્યપ્રેમી સમવયસ્ક પિતરાઈ ભાઈ વિરલ (નામ બદલ્યું છે) સાથે સંગીતાનો પરિચય કરાવ્યો. ત્રણેય ક્યારેક સાથે મળતાં પણ ખરાં. હિના અને એનો ભાઈ ક્યારેક સંગીતાને નિર્દોષ ભાવે હેરાન પણ કરતાં.

પછી તો હિના અને સંગીતાએ મુંબઈની જુદી જુદી કૉલેજમાંથી ગ્રૅજ્યુએશન પૂરું કર્યું. એનાં થોડાં વર્ષમાં અમદાવાદસ્થિત બૅન્ક કર્મચારી ચેતન સંઘવી સાથે હિનાનાં લગ્ન થયાં તો સંગીતા બ્રિટનવાસી ઈલેક્ટ્રોનિક એન્જિનિયર શ્યામ દેસાઈ સાથે વિવાહસંબંધ બંધાઈ. અલગ અલગ કૉલેજ અને પછી લગ્ન, એમ બે વખત બન્ને છૂટાં પડ્યાં તોય દોસ્તી અકબંધ રહી. હા, બન્ને શહેર વચ્ચે જોજનોનું અંતર એટલે સંવાદ ઘટ્યો.