മക്കൾക്കായിജീവിക്കാം പക്ഷേ, മറക്കരുത് സ്വന്തം വാർധക്യത്തെ രിട്ടയർമെന്റ് പ്ലാനിങ് ഇപ്പോഴേ തുടങ്ങാം

കരുക്കൾ നീക്കാം കരുതലോടെ...

- സജീവ് കുമാർ CFP Country Head, Client Operations Excellence & Analytics Bajaj Capital Ltd.

കുറച്ചു നാളുകൾക്കു മുൻപ് അനന്തരാമൻ എന്നെ കാണാൻ വന്നു. വയസ്സ് എഴുപതായി. ജീവിക്കാൻ മാർഗമില്ല. ആകെയുള്ള സമ്പാദ്യമായ വീടു വിൽക്കണം. മകൻ ലണ്ടനിലും മകൾ ദുബായിലുമാണ്.

മക്കൾ കുട്ടികളായിരിക്കുമ്പോൾ അവർക്കായി മാത്രം ജീവിച്ച ആളാണ് അദ്ദേഹം. അനന്തരാമനും ഭാര്യ മാലതിക്കും മക്കൾ മാത്രമായിരുന്നു ലോകം. രാവിലെ അഞ്ചരമണിക്കു ബൈക്കിൽ മകനെ എൻട്രൻസ് കോച്ചിങ്ങിനു കൊണ്ടുവിടും. ഏഴുമണിക്കു തിരിച്ചു വിളിച്ച് ആഹാരം നൽകി സ്കൂളിൽ കൊണ്ടു ചെന്നാക്കും. അതിനു ഫലമുണ്ടായി. മെരിറ്റിൽ സർക്കാർ കോളജിൽ എൻജിനീയറിങ്ങിന് അഡ്മിഷനും കിട്ടി. പക്ഷേ, വിദേശത്തു പോകണം എന്നതിനാൽ ബെംഗളൂരുവിലെ മികച്ച കോളജിലാണ് ചേർന്നത്. അതിനായി നല്ലൊരു തുക വായ്പയെടുക്കേണ്ടിവന്നു. മകളുടെ കാര്യവും സമാനമായിരുന്നു. എന്നും വൈകിട്ട് സംഗീതവും നൃത്തവും പഠിക്കാനും ശനിയും ഞായറും ട്യൂഷനും കൊണ്ടുവിടുകയും തിരിച്ചു വിളിക്കുകയും വേണം.

അവൾക്കു ഫാഷൻ ഡിസൈനിങ് പഠിക്കാനായി മുംബൈയിലെ മികച്ച കോളജിൽ തന്നെ ചേർത്തു. അതിനും ലോണെടുത്തു.

മക്കളുടെ കാര്യങ്ങളും സ്വകാര്യ കമ്പനിയിലെ ജോലിയും കഴിഞ്ഞ് ഒന്നിനും നേരമില്ല. ഒരു സിനിമ കാണാനോ ഒരു യാത്ര പോകാനോ നേരവുമില്ല, മനസ്സുമില്ല.