സിസിടിവി ഉണ്ടായിട്ട് മാത്രം കാര്യമില്ല; അറിയണം ഇക്കാര്യങ്ങൾ കൂടി

വീട്ടിലെ സിസിടിവി ക്യാമറ മറയ്ക്കുകയും ഹാർഡ്ഡിസ്ക് കൈക്കലാക്കുകയും ചെയ്യുന്ന കള്ളനെ പൂട്ടാൻ വഴിയുണ്ട്

- 

കോട്ടയത്ത് അടുത്തിടെ കൊല്ലപ്പെട്ട ദമ്പ തികളുടെ വീട്ടിൽ സിസിടിവിയും റിമോട്ട് കൺട്രോൾ ഗേറ്റും ഉണ്ടായിരുന്നു. പക്ഷേ, മതിൽ ചാടിക്കടന്ന അക്രമി മുൻവശത്തെ ജനാലയുടെ ചില്ലിൽ ഡ്രില്ലർ കൊണ്ട് വിടവുണ്ടാക്കി ജനൽ തുറന്നു.

തുടർന്ന് വാതിലിന്റെ കൊളുത്തും തുറന്ന് വീടിനുള്ളിൽ കയറി ഉറങ്ങിക്കിടക്കുകയായിരുന്ന രണ്ടുപേരെ വധിച്ചു. വീട്ടിലെ സിസിടിവിയുടെ ഹാർഡിസ്ക് കൈക്കലാക്കി കടന്നു.

കോട്ടയം തിരുവാതുക്കലിൽ നടന്ന സംഭവമാണിത്. തിരുനക്കര ഇന്ദ്രപ്രസ്ഥം ഓഡിറ്റോറിയം ഉടമ ടി.കെ.വിജയകുമാറും ഭാര്യ ഡോ. മീരയുമാണ് കൊല്ലപ്പെട്ടത്.

"സിസിടിവി ഉണ്ടെങ്കിൽ പേടിക്കേണ്ട' എന്ന ധാരണയെ ചോദ്യം ചെയ്യുന്നതാണ് ഈ സംഭവം. സിസിടിവിയും റിമോട്ട് കൺട്രോൾ ഗേറ്റും മാത്രം ഉണ്ടായിട്ട് ഒരു കാര്യവുമില്ല; സുരക്ഷാ സംവിധാനങ്ങൾ കാര്യക്ഷമമാണെങ്കിലേ പ്രയോജനമുള്ളൂ. സുരക്ഷാ രംഗത്തെ വിദഗ്ധർ ചൂണ്ടിക്കാട്ടുന്നു.

ക്യാമറ വെറുതേ വെച്ചാൽ പോരാ ഒരു സ്ഥലമോ കെട്ടിടമോ ഒരു കൂട്ടം വീഡിയോ ക്യാമറകളുടെ നിരീക്ഷണ പരിധിയിൽ ഉൾപ്പെടുത്തുന്ന സംവിധാനമാണ് "ക്ലോസ്ഡ് സർക്യൂട്ട് ടെലിവിഷൻ' അഥവാ "സിസിടിവി'.